E Freideg de Moie war de President vun der Bauerenzentral eisen Invité vun der Redaktioun.

D’Gesellschaft géing eng ganz Partie Fuerderungen un d’Landwirtschaft stellen an d’Politik nach e bësse méi, sou de President vun der Bauerenzentral. De Marc Fisch sot de Moien hei op RTL dat wier besonneg am Ëmwelt- a Klimaberäich de Fall.

Ass d’politesch Ausso – ënnert anerem och vun der grénger Ëmweltministesch Carole Dieschbourg – et wéilt een d’Baueren an der Transitioun mat abannen réng Rhetorik? Dem Marc Fisch no géing de Landwirtschaftsminstère matagebonne ginn, „mä net d’Baueren, déi di d’Baueren eigentlech vertrieden“. Ganz dacks géingen d’Baueren réischt informéiert ginn, wann d’Reglementer schonn um Dësch leien. Seng eegen Argumenter kéint een net mat erabréngen, sou de President vun der Bauerenzentral.

Am Géigesaz zur Vergaangenheet géingen déi 3 Baueregewerkschaften (Bauerenzentral, Bauerenallianz, Fräie Lëtzebuerger Bauereverband) haut gutt zesummeschaffen.

„Kommen d’Baueren rëm zesummen?“, sou d’Fro un de Marc Fisch. Seng Äntwert: „Et kann ee sech alles virstellen, mä alles brauch säi Wee“.

D’Bauerenzentral – „centrale paysanne“ huet en Donneschdeg hire 75. Anniversaire gefeiert.

Invité vun der Redaktioun: Marc Fisch

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.