E Méindeg de Moie war déi nei gréng Deputéiert eis Invitée vun der Redaktioun.

Ech war immens iwwerrascht datt ech an d'Chamber koum, dat als Néngtgewielten am Süden. Et ass en Challenge, deen ech ganz eescht huelen, sou déi Gréng Deputéiert Semiray Ahmedova um Méindeg de Mueren am RTL-Interview.

Si ass nom Depart vum Roberto Traversini an d'Chamber nogeréckelt. Si géif och flott am Parlament encadréiert ginn.

Als studéiert Architektin wier si natierlech frou, datt si d'Presidentin vun der Logementskommissioun ass. Liewensqualitéit an de Wunnquartieren, an eng gutt Mixitéit wiere wichteg.

Wunnen, Aarbecht a Fräizäit solle beienee réckelen, och fir d'sozial Kohesioun ze stäerken. Alles dat géif am neie Pacte Logement stoen.

D'Klimaziler, déi sech d'Regierung gesat huet sinn ambitiéis, ma et wier wichteg, datt ee sech ambitiéis Zieler setzt. Gutt wier, datt elo d'Urgence a Saache Klimaschutz erkannt gouf, sou nach d'Semiray Ahmedova vun déi Gréng, déi keng Krise bei de Grénge gesäit.

Et sollt ee sech besser op richteg Krise konzentréiere wéi eben de Logement, sou nach déi nei Gréng Deputéiert.

Invité vun der Redaktioun: Semiray Ahmedova

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.