En Donneschdeg war d'Vice-Bâtonnière Valérie Dupong eis Invitée vun der Redaktioun. Hei goung et ëm d'Ëmsetzung vun enger EU-Direktiv an nationaalt Recht.

D'Affekote maache sech Suerge wéinst der Ëmsetzung an nationaalt Recht vun enger EU-Direktiv. Et geet ëm grenziwwerschreidend Steierpraktike mat aggressivem Charakter, déi solle gemellt ginn, dat vun Intermediairen zu deenen och d'Affekote gehéieren.

Et begréisst een zwar d'Direktiv, ma eist Beruffsgeheimnis gëtt mat der aktuell geplangter Ëmsetzung a Fro gestallt, seet d'Vice-Bâtonnière Valérie Dupong, si war en Donneschdeg de Moien d'Invitée vun der Redaktioun.

Beispillsweis misst den Affekot, wann e feststellt, datt ee vu senge Clienten eng potentiell aggressiv Steierstruktur mécht, dëst un d'Steierverwaltung weiderginn. An dat wier problematesch, well een an deem Fall eppes misst denoncéieren wat legal ass, sou d'Valérie Dupong.

Extrait Valérie Dupong (1)

De Begrëff "aggressiv" wier net kloer, "aggressiv" géif op alle Fall net "illegal" heeschen.

De Barreau reegt sech awer besonnesch iwwer de Finanzminister Pierre Gramegna op. D'Direktiv gesäit nämlech d'Méiglechkeet vun enger Klausel vir, mat där d'Affekote vun der Signalisatiouns-Obligatioun kënne fräigestallt ginn. Ma am Lëtzebuerger Projet 7465 géing genee déi Optioun awer net gezu ginn.

De Finanzministère géing argumentéieren, datt just d'Struktur an net den Numm vum Client misst denoncéiert ginn. En Argument wat de Barreau net gëlle léisst.

Extrait Valérie Dupong (2)

Och no der rezenter Pressekonferenz vum Barreau hätt ee leider keng Reaktioun vum Finanzminister Pierre Gramegna kritt, wat bedauert gëtt. Et géif een d'Hoffnung awer net opginn.

Bei Verstéiss riskéieren d'Affekoten - an aner Intermediairen sou wéi zum Beispill Comptabelen - iwwregens Strofe vu bis zu 250.000 Euro.

Invité vun der Redaktioun: Valérie Dupong

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.