E Méindeg de Moie war d'Presidentin vun der Fedil eis Invitée vun der Redaktioun.

D'Industrie wier net de Problem, mä een Deel vun der Léisung am Kampf géint de Klimachangement. Well et wier d'Industrie, déi zum Beispill, Elektroautoen an Wandmille produzéiert. Dat sot um Méindeg de Moien d'Presidentin vun der Industriellefederatioun, FEDIL, als Invitée vun der Redaktioun. D'Industrie zu Lëtzebuerg wier och nëmme fir 6% vum CO2 Ausstouss responsabel.
Tëscht 2006 an 2016 wier den CO2 Ausstouss an der Industrie zu Lëtzebuerg ëm 45% reduzéiert ginn. Lëtzebuerg wëll seng CO2-Emissioun bis 2030 ëm 55 Prozent erofschrauwen.
Mir wäerten alles maachen déi ambitiéis Klimaziler vun der Regierung mat ze realiséieren.
Dofir brauche mer awer Hëllef, esou d'Invitée vun der Redaktioun weider. Direkt Subventiounen fir d'Industrie sinn awer vu Bréissel verbueden. Dofir denkt een zum Beispill u steierlech Avantagen.

De leschte Mount huet d'FEDIL e Bréif un de Minister vun der Economie, der Educatioun an der Energie gemaach, fir hei ee Parc scientifique ze proposéieren, dat um Belval an der Géigend vun der Uni Lëtzebuerg. Hei sollen d'Recherche an d'Zesummenaarbecht mat der Industrie grouss geschriwwe ginn. Et wier ee bei de politeschen Instanzen op oppen Ouere gestouss an a Gespréicher. Een Delai bis wéini dee Fuerschungspark soll opgemaach ginn, ass nach net festgeluecht. Och wéi de Finanzement sech maache soll ass nach net fix.

Invité vun der Redaktioun: Michèle Detaille

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.