En Dënschdeg de Moie war d'Nora Back eis Invitée vun der Redaktioun.

Kontinuitéit bedeit vill beim OGBL. Onofhängeg vun der Persoun un der Spëtzt, d'Gewerkschaft muss sech ëmmer fir déi nämlech Wäerter asetzen.  Mir mussen den Image vum OGBL awer vläicht moderniséiere... méi jonk, méi cool, awer net onbedéngt méi aggressiv. Dat sot déi nei President vum OGBL Nora Back am RTL-Interview.

Wann de Sozialdialog awer net méi fonctionéiert, kann et och méi wäit goen, Richtung Sozialkonflikt, also Streik. An an deem Kontext muss d'Kollektivvertragsgesetz reforméiert ginn. Et ass ze schwéierfälleg an net kloer genuch.

Och d'Aarbechtsrecht wier net méi un déi nei Aarbechtswelt ugepasst, sou d'Invitée vun der Redaktioun weider. Och hei si Reforme néideg. An esou Diskussioune kéinten nëmmen am Comité permanent de travail et de l'emploi gefouert ginn. 

Déi nei OGBL-Presidentin mécht sech och Suerge wéinst sozialen Ongerechtegkeeten. Stéit géifen ëmmer méi, a Betriber ëmmer manner besteiert ginn. Oder d'CO2 Steier um Bensin. Hei géif et am Klimapak un Detailer feelen, wéi eng Kompensatioune virgesinn sinn.

De Klima- a Energieplang, deen e Freide de Feu-vert vun der Regierung krut, wier net sozial genuch. Den OGBL hätt awer Piste, wéi ee méi sozial kéint ginn. Zum Beispill duerch Steierkreditter, als Kompensatioun fir eng Präishausse um Bensin.

Wat de Poste vum Generalsekretär ugeet, esou géif deen de Moment net besat ginn. Dat bréicht een och net, esou d'Nora Back, well si lo just d'Presidence iwwerholl huet, an de Poste vum Generalsekretär geduecht ass, fir eng Persoun op d'Presidence ze preparéieren.

Op d'Fro wéi no den OGBL nach der LSAP stéing, sot d'Nora Back, datt de Syndikat partei-politesch onofhängeg wier, mä net politesch neutral. Mä et hätt een an de Gremien Leit vun alle politesche Borde sëtzen.

Invité vun der Redaktioun: Nora Back

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.