Den Educatiounsminister Claude Meisch war en Donneschdeg de Moien eisen Invité vun der Redaktioun.

Munches wat mer aus PISA eraus zéie frustréiert mech, munches stëmmt mech positiv. PISA weist awer dës Kéier och, datt mer Weltmeeschter sinn an der Méisproochegkeet, sot um Donneschdeg de Moien den Educatiounsminister Claude Meisch. Hie war eisen Invité vun der Redaktioun.

3,6 Sprooche kënnen d'Lëtzebuerger Schüler, dat sinn annerhallef Sprooche méi wéi an der OECD-Moyenne. Dofir ginn et awer keng Punkten an dat hëlleft net bei den anere Kompetenzen, déi getest ginn.

D'Schüler aus den internationale Schoulen hu bei PISA besser ofgeschnidden. Ënnerschiddlech Schoule fir ënnerschiddlech Schüler... do wëll de Minister weider dru schaffen. De klassesche Wee géif natierlech weider gebraucht ginn. Wäit iwwer 1000 Jonker kréien all Joer eng Première, si gutt an den 3 Sproochen. Mä déi aner bräichten och Chancen.

Ënnert anerem gouf jo och déi méisproocheg Fréifërderung agefouert. De Feedback vum Terrain wär däitlech besser wéi d'Angscht, déi villäicht virun der Aféierung do war, seet de Claude Meisch. Et géif ganz natierlech gemaach ginn, d'Méisproochegkeet wär haut och bei de klenge Kanner present. Et missten awer nach Efforte gemaach gi fir Lëtzebuergesch - a Franséischsproochegt Personal an de Crèchen ze rekrutéieren.

Bis 2030, 2035 dauert et, bis sech Reformen och a PISA-Resultater weisen. Et bräicht ee Gedold an och Konstanz. Net elo Aktionismus, dat géif d'Enseignanten an och d'Eltere veronsécheren. An d'Kanner net besser preparéieren, fënnt den DP-Minister.

Et feelen Enseignanten. Natierlech misst ee weider Jonker motivéiere fir dee Beruff. Mä de Quereinsteigerprogramm – där et ewell a quasi all den europäesche Länner gëtt – géif hien och richteg fannen. Et wär nëmmen normal och Leit mat Beruffserfarung am Enseignement ze hunn.

Mir sollen analyséieren – mat den Acteuren zesummen – wéi mer dat fest an de System era kréien, huet en Donneschdeg de Moien de Claude Meisch gemengt.

Den Educatiounsministère stoung an der Lescht an der Kritik wéinst engem Concours, wou 100 Schüler eng Rees op Dubai op d'Weltausstellung kënne gewannen. D'Regierung hätt decidéiert do matzemaachen, et wär fir hien normal, datt och déi Jonk sech kéinten do dru bedeelegen, wa se da wëllen. Dat wär am Regierungsaccord festgehale ginn. Mënscherechter an och d'Klimakris wären da sécher e Sujet.

De Minister huet och betount, datt kee misst fléien, et gëtt jo kee forcéiert matzemaachen. D'Klimadiskussioun misst och um internationalem Plang gefouert ginn. Andeems ee sech an-igelt, géif een d'Klima net retten. Sou de Claude Meisch am RTL-Interview.

Invité vun der Redaktioun: Claude Meisch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.