De Lëtzebuerger Kardinol war e Freideg de Moien eisen Invité vun der Redaktioun.

Dem Image vu Privileegie misst ee lass ginn. Méi kleng a méi aarm ze ginn, deet eis gutt, fir eis z'erneieren, seet de Kardinol Jean-Claude Hollerich. Hie war um Freideg de Moien eisen Invité vun der Redaktioun.

Zanter dësem Joer huet Lëtzebuerg jo e Kardinol. Ech muss ganz vill Interviewe ginn an dat wat ech soen, kritt vill Opmierksamkeet, sou de Jean-Claude Hollerich. Hie pendelt elo vill tëscht Lëtzebuerg, Bréissel a Roum. Hien ass och President vun der EU-Bëschofskommissioun.

De Lëtzebuerger Äerzbëschof ass ee vun den aktuell 124 Kardineel bis 80 Joer, déi dierfen – wann et nees souwäit ass – de Poopst matwielen. Theoretesch kéint dat och e Lëtzebuerger Poopst ginn, mä et gi besser Leit wéi ech, mengt de Jean-Claude Hollerich.

De Lëtzebuerger Kardinol ass am September hei am Land matgaange bei de Klimaprotester. Déi Jonk hätte Recht. De Klimawiessel wär eng Bedreeung fir d'Mënschheet.

Verzicht géif schwéier falen, dat géif hie bei sech gesinn, gëtt den Äerzbëschof zou. Mä d'Jugend wär et wäert, datt ee seng Gewunnechte ännert. Wann hien alen Dapp, dat nach kéint, kéinten aner Leit dat och.

En anere Sujet um Freideg de Moie waren d'Flüchtlingen. Hie fënnt et onméiglech, datt mir Leit um Mëttelmier erdrénke loossen, d'Aen zoumaachen. D'Lager a Libyen wäre grausam. Eng grouss Afrika-Politik vun Europa wär néideg. Hien huet och speziell grousse Respekt fir den Asaz an d'Politik vum Ausseminister Jean Asselborn ënnerstrach.

De Mëssbrauch an der Kathoulescher Kierch ass och am Interview ugeschwat ginn. Zu Lëtzebuerg misst méi géint de sexuelle Mëssbrauch vu Kanner a Jugendleche gemaach ginn. Et wär gutt, datt de Poopst François elo d’peepstlecht Geheimnis bei Mëssbrauchsfäll opgehuewen huet. Mä et géif och op anere Plaze Fäll vu Mëssbrauch ginn, do kéint een zum Beispill eng Table ronde fir d’Protektioun vu Jonke géint den Abus sexuell maachen. Et misst aus Feeler geléiert an e séchert Ëmfeld fir Kanner a Jugendlecher geschafe ginn.

Chrëschtdag, dat si fir den Äerzbëschof d'Metten an der Kathedral, an d'Mass op Chrëschtdag. Iesse mat der Famill, ënnert anerem senger Mamm. D'Mass op Stiefesdag am Prisong, dat wär seng léifste Mass. Sou de Lëtzebuerger Kardinol Hollerich.

Invité vun der Redaktioun: Jean-Claude Hollerich

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.