Déi 3 Journaliste vum Wort, Tageblatt a Journal waren en Dënschdeg de Moien eis Invitéë vun der Redaktioun.

Invité vun der Redaktioun: Journalistesche Bilan 2019

Fir deen een huet den Tornado am August d'Joer 2019 markéiert. Fir deen aneren ass et de politesche Volet, an do virop déi Gréng mat hirer Kris. An och d'Dräierkoalitioun huet dëst Joer éischter een duerchwuessene Bilan virzeweisen, ass d'Impressioun vum Dhiraj Sabharwal vum Tageblatt. Hie war ee vun den Invitéen en Dënschdeg de Moien hei op RTL.

Do gouf an enger Journalisteronn mam Claude Karger vum Journal, dem Marc Schlammes vum Wort a mam Diraj Sabarwhal vum Tageblatt de Point vum politesche Joer gemaach, dat mat enger sozialer Mesure ugefaangen huet.

D'Joer 2019 hat gutt ugefaange mat der Mindestlounerhéijung... Duerno wier awer net méi vill nokomm, war d'Meenung vun de Journalisten. Den Dhiraj Sabharwal vum Tageblatt geet nach ee Krack méi wäit a sot "D'LSAP gouf an d'Täsch gestach vun de Gréngen."

AUDIO: Journalisteronn / Rep. Nadine Gautier (31.12.19)

Mam Schicksalsschlag vum Félix Braz an dem Récktrëtt vum Etienne Schneider huet d'Regierung missen nei forméiert ginn. Besonnesch interessant dierft et elo ginn, wéi den Dan Kersch sech als Vizepremier duerchsetze wäert.

Datt de Xavier Bettel an den Dan Kersch sech ëffentlech uleeë wäerten, wäert net geschéien, mä hannert de Kulisse kéint dat aneschters ausgesinn, esou den Diraj Sabarwhal. Duerch d'Changementer an der Regierung krut den Henri Kox de Logement. Ee Ministère, dee wärend Bettel 1 an 2 a véier verschiddenen Hänn war, bezéiungsweis ass.

Aner Sujete waren de Casier judiciaire, d'Email-Affär, oder d'Gaardenhäischen.

Invitéen am Live-Gespréich en Dënschdeg waren:

de Marc Schlammes vum WORT,

den Dhiraj Sabharwal aus dem Tageblatt,

an de Claude Karger vum Journal.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.