De President vun der Copas, dem Daachverband vun de Prestatairen am Fleegesecteur, war en Dënschdeg de Moien eisen Invité vun der Redaktioun.

Et gëtt keen Ulass, fir d'Präisser an de Fleege- an Altersheemer elo ze héijen. Dat sot de Marc Fischbach, President vun de Copas, dem Daachverband vun de Prestatairen am Fleegesecteur.

6 bis 7 Haiser krute jo vum Staat Kompensatioune fir den Accord Salarial am Fleegesecteur zougesprach. Dës Kompensatioune wieren awer nach net komm.

Stéchdatum ass de 16. Juni. Dann ass de Moratoire vun zwee Joer nämlech ofgelaf, datt Präisser net däerfe gehéicht ginn. Wa bis dohinner Näischt geschitt, kéinten d'Präisser an de concernéierten Heemer awer klammen.

Mir sinn Demandeur fir Transparenz bei de Präisser, ënnersträicht de Marc Fischbach.

Mä et géif een nach op den Präis-Regëster waarden, deen d'Familljeministesch annoncéiert huet. Sou nach de Copas-President.

Et wier awer wichteg, datt d'Leit en detailléierten Iwwerbléck vun de Präisser vu den eenzelen Haiser kréien.

De Virschlag vun der Salariatskummer, fir eng "Charte du respect de la personne âgée” a Qualitéitskontrollen anzeféieren, fënnt d'Copas gutt, mä et hätt een net op déi Propose gewaart, déi Propose wier et scho ginn. Den Daachverband vun de Prestatairen hätt selwer schonn 2013 an 2014 esou eng Ethik a Qualitéitscharta ënnerschriwwen.

Viru bal zwee Joer gouf d’Fleegeversécherung reforméiert. Deemools huet de Romain Schneider betount, datt et keng Reform sollt sinn, fir et méi komplizéiert a méi schlecht fir d’Leit ze maachen. D'Copas hätt nach net genuch Recul gehat, fir d'Reform richteg ze beurteelen. Dat sollt dëst Joer awer de Fall sinn. Dann hätt een déi néideg "Masse critique, fir sech ze äusseren".

Invité vun der Redaktioun: Marc Fischbach

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.