E Mëttwoch de Moien war de President vun der Bréifdréieschgewerkschaft eisen Invité vun der Redaktioun.

D'Bréifdréier gi moies, 70, 80 oder souguer 90 mol scho schellen, sot de President vun der Bréifdréieschgewerkschaft.

De Raymond Juchem huet sech e Mëttwoch de Moie bei eis op der Antenn iwwert déi vill Päck beklot, déi neierdéngs an d'Tournéeën integréiert goufen. Zemools am Dezember wieren d'Autoe mat de Päck iwwerfëllt gewiescht. 3% manner Bréiwer, géif dat sécher net opfänken.

Hannergrond ass eng nei Strategie am Post Courrier. Déi hat d'Bréifdréieschgewerkschaft am Verwaltungsrot och acceptéiert. D'Generaldirektioun hätt sech awer net un dat gehalen, wat ofgemaach war. D'Reklamme goufen nämlech  bis ewell net, wéi annoncéiert, erausgeholl, wat fir sou munch organisatoresch an zäitlech Problemer suergt, sou eisen Invité vun der Redaktioun. D'Direktioun hätt elo awer d'Zouso ginn, fir d'Situatioun an dësem Joer ze klären. Dorobber zielt d'Bréifdréieschgewerkschaft och.

Gekläert gouf antëscht de Problem mat den duebelen Tournéeën, déi an der Vergaangenheet quasi zur Reegel gi waren. Fir deem entgéintzewierken, wieren zejoert verstäerkt Leit agestallt ginn, wat de Raymond Juchem begréisst. An engems huet de Gewerkschaftsvertrieder awer gefuerdert, datt d'Tournéeën nach emol missten um Hannergrond vum Populatiounswuesstem iwwerkuckt ginn.

Bei den aktuelle Kollektivvertragsverhandlunge fuerdert de Raymond Juchem, datt sech d'Gewerkschaften endlech ënnert seech eens ginn. An net méi driwwer streiden, wie wat duerchgesat huet. Den neie Kollektivvertrag sollt u sech virun Enn 2019 stoen. D'Sozialwalen zejoert ënnert anerem hätten dee Prozess awer ausgebremst.

D'Bréifdréieschgewerkschaft bleift all Zäit bei hirem Fuerderungskatalog. Virun allem missten d'Mataarbechter am Privatstatut besser Loun- an Aarbechtskonditioune kréien. Fin de carrière géifen hir Paien alt 30% ënnert deenen am Beamtestatut leien.

Weider huet de Raymond Juchem annoncéiert, datt am Februar zu Réimech deen nächste Postbüro zougemaach gëtt. D'Post fiert hei mat hirer Strategie weider. Lues a lues, sollen et just nach 15 bis 25 klassesch Büroen am Land ginn, wat d'Gewerkschaft nach ëmmer bedauert. De Raymond Juchem fuerdert virun allem och, datt d'Gemenge besser informéiert ginn, wéi et da mam Postservice bei hinne weider geet.

Wat de neien zoustännege Minister Franz Fayot ugeet, wéisst hien nach net genee, wat dëse wëlles huet, sou de President vun der Bréifdréieschgewerkschaft weider. Mam Etienne Schneider war hien op alle Fall zefridden.

Invité vun der Redaktioun: Raymond Juchem

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.