En Dënschdeg de Moie war den Direkter vum ACL eisen Invité vun der Redaktioun.

Politik ass am gaangen Autofuere méi deier ze maachen. D'Hausse vun den Accisen op Bensin an Diesel wier eng zousätzlech Recette fir de Staat. Et géif dem Klima näischt bréngen. Dat seet de Jean-Claude Juchem, Direkter vum ACL, dem Automobilclub. Hie war um Dënschdeg de Moien eisen Invité vun der Redaktioun.

D'Leit misste mam Auto schaffe fueren. 80% hätte keng aner Méiglechkeet. D'Alternativen wären haut nach net gutt genuch. Och déi annoncéiert CO2-Steier wäert d'Automobilisten zousätzlech belaaschten.

Den Autosfuerer wär d'“Cash-Kou“ vum Staat. Lues a lues géif d'Autofuere méi deier ginn.

Déi nei WLTP-Norm fir d'Autosteier ze berechnen, déi vum Mäerz un hei am Land applizéiert gëtt, wär u sech eng gutt Saach. Den Timing wär awer net gutt. Et wär elo iwwerraschend komm. An 10 Deeg géif den Autosfestival ufänken. D'Leit wären net informéiert, mengt de Jean-Claude Juchem, Direkter vum Automobilclub.

A puncto Elektromobilitéit bléife mer weiderhin wäit hannert den Ziler, seet den ACL-Direkter, esouwuel bei den Infrastrukturen ewéi och bei de Bornen. De Käschtepunkt vum Elektroauto wier nach ëmmer ze héich, ma dat dierft sech awer duerch d'Masseproduktiounen änneren, mengt de Jean-Claude Juchem.

Den ACL huet haut 187'000 Memberen a mécht eng 45'000 Depannagen d'Joer, an de meeschte Fäll wéinst enger Pann um Auto, Problemer mat der Batterie oder de Pneuen.

Invité vun der Redaktioun: Jean-Claude Juchem

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.