En Dënschdeg de Moie war den Deputéierte vun déi Lénk eisen Invité vun der Redaktioun.

D'DP hätt keen Interessi dorunner, de Logementsproblem an de Grëff ze kréien, se hätt nämlech Liene mam Milieu, dee spekuléiert. Dat sot den David Wagner vun déi Lénk en Dënschdeg de Moien am RTL-Interview.

Och LSAP an déi Gréng wéilten net ganz wäit do goen. Et wäert nëmmen e klenge Kompromëss fonnt ginn, deen net duergeet, déi grouss Spekulanten ze bremsen.

De Pacte Logement 2.0 geet dem Deputéierte vun déi Lénk och net duer. D'Gemenge kënnen, mä mussen net méi abordabel bauen. D'Mesuren am neie Pacte Logement wiere just e puer Drëpse méi op de waarme Steen.

Allgemeng misst ee fort vun deem abléckleche Kapitalismus hei am Land. Op Topegkeete wéi Google oder Jughurtsfabrick misst ee verzichten an dës Terraine fir méi Soziales notzen, sou den David Wagner.

De Klimapak dann. Dee géif net déi treffen, déi d'Ëmwelt an der Haaptsaach belaaschten, nämlech d'Industrie, mä déi Leit, déi zum Beispill op den Auto ugewise sinn.

Déi Lénk setze sech och dofir an, datt d'Postgebai um Aldringen an der Stad an ëffentlecher Hand bleift a fir d'Allgemengheet genotzt gëtt. Dat géif och fir aner Postgebaier am Land gëllen. Et wär irresponsabel, dat wëlle lass ze ginn.

Een Thema am Interview war och de groussherzoglechen Haff.

Um Haff sollen d'Leit richteg behandelt ginn, wéi op all Plaz och. Mä Arbeitgeber, déi sech net korrekt behuelen, géif et och op anere Plaze ginn.

Déi Lénk si fir eng Republik, ënnerstëtzen d'Monarchie net. Et géif net ëm d'Persoun selwer goen, ob se sympathesch wier oder net. Mä d'Institutioun Monarchie géif dofir stoen, datt et Mënsche gëtt, déi besser gebuer sinn.

Och symbolesch Posten am Staat misste kënne gewielt ginn, seet den David Wagner vun déi Lénk.

Invité vun der Redaktioun: David Wagner

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.