E Freideg de Moie war d'Cheffin vun der Vertriedung vun der EU-Kommissioun zu Lëtzebuerg eis Invitée vun der Redaktioun.

Et ass Brexit-Day: Vu Mëtternuecht un ass Groussbritannien net méi Member vun der europäescher Unioun. Fir d'Leit an d'Entreprisen ännert direkt näischt. Par konter hunn d'Britten näischt méi ze soen an der EU, musse sech awer nach an der Iwwergangsphas bis d'Enn vum Joer un d'Reegele vun der Unioun halen, sou d’Yuriko Backes. D'Vertriederin vun der EU-Kommissioun huet e Freideg de Moien op der Antenn vun RTL ze bedenke ginn, datt dat eng extrem kuerz Zäit ass, fir en Accord auszehandelen.

Ob e Risiko besteet, datt London op Nischepolitik setzt an d'Lëtzebuerger Finanzplaz menacéiere géing, dat wier schwéier ze soen. D'Yuriko Backes huet op d'Mandat verwisen, deen déi 27 EU-Memberstaaten der Kommissioun fir d'Verhandlunge mat op de Wee ginn hunn. De Mandat ass, datt en Accord muss garantéieren, datt London an Zukunft och déi aktuell Mindeststandarde muss respektéieren, sief et sozial, ekologesch oder um Niveau vun de Steieren.

All Memberstaat huet seng eegen Interessien, sou d'Yuriko Backes. De Chefnegociateur Michel Barnier géing d'Interessie vun der EU-Kommissioun, mä awer och – genee wéi déi lescht Joren – reegelméisseg och op Lëtzebuerg kommen, fir déi Interêten och gutt ze verstoen.

D'Vertriederin vun der EU-Kommissioun hei zu Lëtzebuerg huet sech optimistesch ginn, datt bis Enn dës Joers eng gutt Basis ausgehandelt wäert sinn, fir eng nei Relatioun mam Vereenegte Kinnekräich.

Invité vun der Redaktioun: Yuriko Backes