E Méindeg de Moie war de Politiker vun der CSV eisen Invité vun der Redaktioun.

Et wier en excellente Rapport, ouni Virurteeler, deen op Schwaachstellen am Management vum groussherzoglechen Haff hiweist. Sou de Laurent Mosar iwwert de Waringo-Rapport.

D'CSV géif weider fir d'Monarchie plädéieren an net fir eng Republik. Ma et wëll een eng transparent, weltoppen a modern Monarchie. D'Bierger musse gesinn, wat mat de Suen, déi den Haff zougestane kritt, geschitt, esou den CSV Deputéierte Laurent Mosar e Méindeg de Moien. Hie war eisen Invité vun der Redaktioun. De Laurent Mosar huet awer kritiséiert, datt de Rapport nach net vun der Regierung kommentéiert gouf. Hien hätt d'Gefill, datt déi waarme Gromper einfach vum Staatsminister un d'Chamber weider gereecht gouf. Dat wier inakzeptabel.

D'Revelatiounen, déi am Text stinn, wiere fir de groussherzoglechen Haff eng Chance. Bei der Ëmsetzung vun de Conclusioune kéint de Jeannot Waringo, den Auteur vum Rapport, direkt mat agebonne ginn, fënnt de Laurent Mosar. Et stéinge konkret Proposen dran, déi een ouni Problemer séier kéint ëmsetzen. Wichteg wier elo hei voll Transparenz ze kréien.

De Roll vum Grand-Duc stéing an der Verfassung dran. Et misst awer méi konkretiséiert ginn, wat d'Roll vun engem Conjoint vun engem Staatschef ass. Do misst um Niveau vun der Verfassung nogerëscht ginn.

Vun en Dënschdeg un huet d'Land een neie Wirtschaftsminister. De Franz Fayot iwwerhëlt d'Successioun vum Etienne Schneider. Vum Franz Fayot wéilt d'CSV wëssen, wéi ee Wee hie wëlles huet anzeschloen, zum Beispill am Space Mining, am Dossier Join oder och nach op de Volete Verméigenssteier fir Privatpersounen an Ierfschaftssteier. D'Ierfschaftssteier ass a bleift fir d'CSV eng ongerecht Steier, esou eisen Invité vun der Redaktioun.

Invité vun der Redaktioun: Laurent Mosar