En Donneschdeg de Moie war den LCGB-President Patrick Dury eisen Invité vun der Redaktioun.

Den LCGB wëll eng Gewerkschaft sinn, déi wëll méi fir d'Leit do sinn. Net nëmmen an, mä och nieft de Betriber. Dat ass dat neit Konzept vun der Gewerkschaft, sou de President Patrick Dury am RTL-Interview.

Dowéinst wieren och schonn nei Büroen zu Esch an zu Déifferdeng opgaangen, a Mëtt 2021 plënnert den LCGB zum groussen Deel vun der Stater Gare op de Belval. Et hält een awer een Informatiounsbüro an der Stad.

Knapp 43.000 Memberen huet den LCGB den Ament. Zanter de Sozialwale wieren der vill bäikomm. 2011 waren et der 33.000 Memberen.

Bei der Steiererform erwaart sech den LCGB-President Entlaaschtungen, an datt ee beim Ausschaffe mat agebonne gëtt.

Eng aner Fuerderung: Méi Kollektivverträg an de Betriber oder aner Léisunge fir dezent Paien a gutt Aarbechtskonditiounen.

Dat muss am Comité permanent du travail et de l'emploi diskutéiert ginn, also och mam Patronat. An deem CPTE hätte sech d'Gemidder zwar berouegt, de Konflikt mam Patronat wier awer nach ëmmer net ganz vum Dësch, sou de Patrick Dury.

De 14. Mäerz huet den LCGB Nationalkongress, wou och den neie President gewielt gëtt. De Patrick Dury ass aktuell den eenzege Kandidat.

Invité vun der Redaktioun: Patrick Dury