D’Vertrieder vun den Hoteller, Restauranten a Cafée fuerderen e Kader fir Airbnb a warnen anerersäits virun zevill ambitiéisen Ëmweltoplagen.

D’Politik muss Airbnb gesetzlech encadréieren. „Mir mussen eng Method fannen fir ze legiferéieren“, esou den Alain Rix, President vun der Horesca-Federatioun e Méindeg de Moien hei op RTL. D’Internet Plattform, op där Leit hir Wunneng kënne weiderverlounen, misst déi selwecht Reegelen anhalen wéi Hoteller.

D’Hoteller, d’Restauranten an d’Bistroe wiere mat engem weidere Punkt konfrontéiert an zwar déi nei ekologesch Oplagen. De grousse Klima- an Energieplang géing dem Alain Rix no ee „Surcoût“ fir d’Betriber duerstellen. De President vun der Horesca-Federatioun huet beispillsweis d’Hausse vum Mazout kritiséiert, déi engersäits Käschte fir d’Betriber géing matsechbréngen an op der anerer Säit duerch d’Indexupassungen hiert Zil géing verfeelen.

Den Alain Rix huet awer agesinn, datt Betriber wuel och Ënnerstëtzung vum Staat kréien, fir sech nei opzestellen, „mä mir mussen awer kucken, datt déi Subsiden, déi mer kréien, och kënnen esou ugewannt ginn, wéi se sollen“. De President vun der Horesca huet d’Beispill genannt vun engem Mann, dee just en Deel vu sengem Daach huet dierfe maachen, well en deen nächste Subsid réischt 3 Joer méi spéit konnt ufroen.

D’Vertrieder vun den Hoteller, Restauranten a Caféen organiséieren iwwregens e Méindeg e groussen Atelier an der Chambre de Commerce, fir klenge Betriber Tipps ze ginn, fir sech un d’Digitaliséierung an un d‘Ëmweltpolitik unzepassen. Donieft huet d’Federatioun eng Campagne lancéiert, fir “Ambassadeuren” ze fannen.

Invité vun der Redaktioun: Alain Rix

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.