D'Presidentin vum Presserot, d'Ines Kurschat, war e Mëttwoch de Moien eis Invitée vun der Redaktioun.

Déi finanziell Hëllef vum Staat fir d'geschriwwe Press gëtt reforméiert. Der Presidentin vum Presserot no, kéint een d'Pressehëllef och als Mëttel ugesinn, fir d'Onofhängegkeet vun de Medien ze stäerken.

D'Pressehëllef gëtt reforméiert, dem Avant-projet no soll an Zukunft d'Zuel u Journalisten Haaptkrittär sinn, fir d'finanziell Enveloppe ze berechnen an net méi wéi elo, d'Zuel u gedréckte Säiten. Donieft ass awer och e Plaffong virgesi vun maximal 2,5 Milliounen Euro pro Mediegrupp. Dat huet d'Presidentin vum Presserot a Journalistin bei der Wochenzeitung "d’Land", Ines Kurschat, e Mëttwoch de Moien hei op RTL erkläert. Kéint et sinn, datt de Grupp Editpess (bekannt fir d'Tageblatt) mat der Reform verléiert? Rechent een nämlech d'Hëllef, déi Editpress indirekt fir de Quotidien an d'Revue kritt, kéim de Grupp iwwert de Plaffong? All Grupp mécht do seng Rechnungen, seet d'Ines Kurschat: "Do hat Editpress relativ vill, also ech ka mir virstellen, datt et fir si vläicht net onbedéngt déi selwecht Rechnung ass wéi virdrun".

Wat net als Krittär fir finanziell Hëllef vum Staat zeréckbehale gouf, dat ass d'Zuel vun de Lieser. Eng gutt Saach, mä dem Ines Kurschat no misst een als Editiounshaus awer seng Lieser ëmmer virun Aen hunn.

Wéi fräi sinn d'Medien nach, wann ee vu Publicitéit ofhängeg ass? Kënne Medie fräi iwwert Firme schreiwen, duerch déi si mat der Publicitéit matfinanzéiert ginn?  "Jo", äntwert d'Ines Kurschat, mä all Journalist "wann en éierlech ass", géing Geschichte kennen, wou Annonceure wéinst engem kriteschen Artikel Drock ausgeüübt hätten. An deem Sënn géing d'staatlech Hëllef de Medien erméiglechen, sech géigeniwwer eventuellem privatem Drock z'emanzipéieren, sou d'Ines Kurschat.

Invité vun der Redaktioun: Ines Kurschat

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.