E Freideg de Moie war d'Stater Buergermeeschtesch eis Invitée vun der Redaktioun.

„Jo, mir hu laang Prozeduren“. Dat well ëmmer nei Schwieregkeeten opdauchen, esou d'Stater Buergermeeschtesch Lydie Polfer e Freideg de Moien iwwert d'Infrastruktur-a Bauprojeten am Land a speziell an der Stad. Et géing reegelméisseg Leit ginn, déi net méi wéilte bei engem Projet matmaachen, wat fir Retarde géing suergen.

Den Naturschutz - mir wëllen deen och, sou d'Lydie Polfer – dee kéint och e Projet no hanne verréckelen. An engem Bebauungsplang missten zum Beispill ëmmer viru Februar Beem ewech gemaach ginn. Geschitt dat net, verléiert een e ganzt Joer.

Autorisatiounen kënne Mol méi laang op sech waarde loossen, gëtt dat bewosst gemaach, sou d’Fro. "Ech hoffen net", huet d’Lydie Polfer geäntwert.

Taxen: "eng equilibréiert Äntwert"

D’Wirtschaft "boomt" an dat huet vill Virdeeler, mä bréngt eben och Schwieregkeete mat sech, dorënner d’Hausse vun de Präisser, huet d'Stater Buergermeeschtesch erkläert.

Wann d'Präisser an d'Luucht ginn, dann ass dat demr Lydie Polfer no "net net just fir d’Groussproprietären gutt, mä och fir den Eenzelen, dee säin Haus verkeeft". Datt awer den Eenzelen, deen eng Plus-value mécht, rëm méi op den Dësch muss leeën, fir sech en neit Haus ze kafen, dat wier "fir jiddereen d'selwecht".

Op eng Spekulatiounstaxe op Terrainen oder Wunnengen ugeschwat, huet d'Lydie Polfer gemengt, et misst een ëmmer de Kontext kucken. Si weist sech awer oppen. Wann een eng equilibréiert Äntwert dorobber fënnt... "firwat net?", sou d'Lydie Polfer.

Wat eng Steier op auslännesch Investissementer an den Immobilien ugeet sot d'Buergermeeschtesch, dat wier eng Kompetenz vun der Regierung a net vun de Gemengen.

Mesuren fir de Garer Quartier

D'Gemeng Lëtzebuerg huet en Donnescheg eng Rei Mesuren ugekënnegt fir de Geschäftsleit am Stater Garer Quartier, déi ënnert de Chantiere leiden, ënnert d'Äerm ze gräifen. Firwat elo réischt ? "Nee, dee Chantier, gewëss, ass bekannt, mä et ass op kenger Plaz, wou den Impakt effektiv esou grouss ass", sou d’Äntwert vun der Lydie Polfer.

Et géing schonn d'Méiglechkeet gi bei Luxtram dedommagéiert ze ginn an d'gratis Stonn am Parking wier schonn eng Kéier agesat ginn a wéinst dem Succès elo nach eng Kéier decidéiert ginn. Datt d'Gemeng sech elo mobiliséiert, hätt "bestëmmt net" eppes domadder ze dinn, datt d'DP-Ministesch Corinne Cahen d'lescht Joer e Bréif un de Geschäftsverband gemaach hat, fir datt méi fir d'Garer Geschäftsleit gemaach gëtt.

3 Joer no de Gemengewalen an 3 Joer virun den nächste Gemengewalen wollt d'Lydie Polfer nach net verroden, ob si nach eng Kéier mat an d'Wale geet. "Déi Diskussioun, déi steet elo net un", huet si gelaacht.

Invité vun der Redaktioun: Lydie Polfer

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.