E Méindeg de Moie war de Generalsekretär vun de jonke Sozialisten eisen Invité vun der Redaktioun.

Resumé Invité Amir Vesali / Reportage Annick Goerens

Wat déi personell Erneierung ugeet, maachen déi Gréng villes besser wéi d'LSAP. Dat war de Constat e Méindeg de Moie vun eisem Invité vun der Redaktioun, dem Generalsekretär vun de jonke Sozialisten. Den Amir Vesali huet donieft eng Rei Mesurë proposéiert, fir dass och déi Jonk bei de Sozialisten eng Chance kréien.

Dass déi Gréng villes besser maachen, hätt sech réng op d'Personal-Erneierung bezunn an net op hir Politik, präziséiert den Amir Vesali e Méindeg de Moien am Interview.

Amir Vesali: "Déi Gréng haten engersäits eng systematesch Approche, fir sech ze verjéngeren an anerersäits hunn eng Rei onglécklech Ëmstänn dozou gefouert, dass si misste jonk Leit mat an d'Boot huelen."

Bei der LSAP wier et e Systemfeeler ginn, sou dass et net all 10 Joer zum Generatiounswiessel komm wier. Fir dass eng Erneierung ka kommen, brauch et och Kandidate mat den néidege Kompetenzen, dofir huet de jonke Sozialist e Méindeg de Moien eng Rei Mesurë proposéiert, zum Beispill de Parrainage.

Amir Vesali: "Dat heescht ee Jonken, deen een erfuerene Politiker un d'Säit gestallt kritt, deen him d'Méiglechkeet gëtt, sech an Dossieren eranzeschaffen, den och mat Leit um Terrain ass fir gesinn ze ginn, well mir mussen einfach déi zwee hei am Land a Betruecht zéien. An ech mengen, wa mir dat deemnächst, sief et mat der neier Presidentin oder mam neie President hikréien, wier et awer duerchaus méiglech, dass mir bei den nächste Walen nees kënne gutt ofschneiden."

Donieft proposéiert den jonke Politiker awer och: "Permanencen an eise Bezierker, fir am reegelméissegen Austausch mat de Bierger ze sinn. A firwat och net, et wier een „nice to have“ eng Duebelspëtzt, e jonke Sozialist an een erfuerene Politiker."

Doniet wier richteg, dass d’Sozialdemokrate generell an Europa e bëssen an enger Kris wieren, an et misst een de Leit elo nees eng Politik ubidden, wou d’Leit sech erëmfannen, sot de JSL-Chef. Ugesat gi misst beispillsweis onbedéngt beim Logement. D’Relatioun tëscht der JSL an der Mammepartei wier iwwregens nees méi roueg ginn. D’Tensiounen, déi et nach viru kuerzem gouf, hätte sech geluecht. Fir d’JSL ass et kruzial, dass mam neie Parteipresident, oder der neier Presidentin, e permanenten Austausch geschitt.

Invité vun der Redaktioun: Amir Vesali

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.