E Méindeg de Moie war d'Historikerin Renée Wagner eis Invitée vun der Redaktioun.

Lëtzebuerg feiert aktuell 100 Joer universaalt Walrecht a bis September ass dozou eng Ausstellung am Geschichts- a Konschtmusée um Fëschmaart. No 5 Méint Ausstellung zéien d'Organisateuren e positiven Tëschebilan. D'Co-Kommissärin fir d'Ausstellung #wielewatmersinn, d'Renée Wagener, sot e Méindeg de Moien hei op RTL, si wier iwwerrascht well d'Thema u sech "net sou sexy ass". Obwuel quasi just Dokumenter zur Verfügung waren, fir d'Ausstellung ze preparéieren, hätt een awer vill Interaktivitéit erakritt. D'Leit kënne beispillsweis hir eege Meenung zum Thema Walrecht ofginn an och do wieren d'Bäiträg ganz positiv.

Op der Ausstellung um Fëschmaart gëtt awer och d'Thema "Demokratiedefizit" ugeschnidden, andeems de Verglach mat der Vergaangenheet gemaach gëtt, wou nëmmen déi räich Männer duerfte wielen. D'Historikerin huet erkläert: Deemools war e groussen Deel vun der Populatioun ausgeschloss, wat haut rëm de Fall ass, well ee muss d'Nationalitéit hunn. Thema Walalter wier awer och nach ëmmer en Thema, sou d'Renée Wagener.

D'Ausstellung iwwer 100 Joer universaalt Walrecht ass gratis an dauert nach bis de 6. September. All Infoe sinn op wielewatmersinn.lu an op rtl.lu.

Dësen Donneschdeg a Freideg ass och e grousse "Colloque" am Zesummenhang mam Walrecht an der Chamber.

Invité vun der Redaktioun: Renée Wagener

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.