En Donneschdeg de Moie war d'Directrice vun der Adem eis Invitée vun der Redaktioun.

Mir hu keng Baisse méi vum Chômage, éischter eng liicht Hausse.

Derbäi kënnt de Paradox, datt a verschiddene Secteuren déi richteg Leit feelen, fir d'Aarbechtsplazen ze besetzen. Deen Desequiliber huet sech zougespëtzt, seet d'Isabelle Schlesser, Direktesch vun der Adem. Si war um Donneschdeg de Moien eis Invitée vun der Redaktioun - um RTL-Jobdag.

D'Croissance um Aarbechtsmaart wär nach do, mä net méi sou staark wéi zejoert. Et hätt een 8'000 oppe Plazen zu Lëtzebuerg, dat wären der ganz vill. Mä d'Profiller vun de 16'500, déi eng Aarbecht sichen, géifen dacks net passen. Héich qualifizéiert Leit wéi zum Beispill Informatiker gi gesicht, mä och manner qualifizéiert Leit am Horesca-Secteur oder an der Constructioun.

Do misst ee mat Formatioun reagéieren. Dat hätt natierlech seng Limitten. Mä et kéint ee schonn intervenéieren. Eng 4'000 Leit kréien all Joer iwwer d'Adem eng Ausbildung offréiert, sou d'Isabelle Schlesser.

Weider bräicht een nach méi eng grouss Transparenz um Aarbechtsmaart. Wou sinn déi oppe Plazen? D'Entreprise si weider opgeruff, all fräi Plazen ze mellen. Och fir ze wësse wéi eng Profiller genee gesicht ginn, seet d'Direktesch vun der Adem.

Invité vun der Redaktioun: Isabelle Schlesser

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.