E Freideg de Moie war de Lëtzebuerger EU-Kommissär Nicolas Schmit, zoustänneg fir d'Aarbecht, eisen Invité vun der Redaktioun.

Leider verbidden d'Traitéen net, datt d’Grenzen zougemaach ginn, huet den EU-Kommissär Nicolas Schmit e Freideg de Moien hei op RTL bedauert. D’Grenzen zoumaachen, wier awer eng Iwwerreaktioun. A Krisesituatioune géing een dacks rëm méi Nationalismus spieren, dat hätt een och wärend der Migratiounskris gesinn.

Och a Punkto finanziell Solidaritéit struewelt d’Europäesch Unioun am Moment. D’Fro vun de Corona-Bonds, gemeinsam Scholden, ass net méi direkt op der Dagesuerdnung, sou den Nicolas Schmit. Den EU-Kommissär sot par konter, et géing nieft enger Hausse vum EU-Budget iwwert een neien "Recovery Fund" geschafft ginn, een Instrument, fir de Memberstaaten finanziell ënnert d’Äerm ze gräifen. An dréchenen Dicher ass nach näischt. Den Nicolas Schmit huet gewarnt, de Risk, datt den Euro zesummebrécht, ass net total onméiglech. Déi Länner, déi sech striewe géint méi Solidaritéit, musse sech däers bewosst sinn.

Europa kritt dacks Reprochë gemaach, sou den Nicolas Schmit weider. Eigentlech wieren awer d’Memberstaate Schold drun, datt Europa net méi zesummenhält an zesummeschafft. D’EU-Kommissioun huet extrem limitéiert Kompetenzen, och wat de Gesondheetsberäich ugeet. D’Unanimitéit ass en Handicap. Et wier nëmmen ze hoffen, datt en Ëmdenke kënnt. "Ech wëll eigentlech optimistesch sinn", sou den Nicolas Schmit. Op d’Fro, ob et kéint zu Traité-Ännerunge kommen, huet de Kommissär eng aner Fro gestallt: "ee Käreuropa, ass dat wënschenswäert?" Hie géing déi Optioun op jiddwer Fall net total ausschléissen, mä se hätt och hir Geforen.

Invité vun der Redaktioun: Nicolas Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.