E Méindeg de Moie war de President vun der Union Commerciale vun der Stad Lëtzebuerg eisen Invité vun der Redaktioun.

Faillitte goufen an der Stad nach keng gemellt, sou de President vun der Union Commerciale vun der Stad Lëtzebuerg. De Guill Kaempff huet e Méindeg de Moien am RTL-Interview awer erkläert, datt eng Rei Geschäfter, haaptsächlech Chaînen, hire Bail – Lokatiounskontrakt also – gekënnegt hunn. De Geschäftsmann huet bedauert, datt d’Regierung net méi konsequent war, fir de Commercë bei de Loyeren z’ënnerstëtzen. Den Handel an der Stad géing an e puer Méint awer sécher net méi d’selwecht ausgesi wéi virdrun.

Wat déi grouss Hëllef vum Staat ugeet – de Chômage partiel – do huet de Guill Kaempff och un d’Regierung appelléiert, d’Mesurë bis Enn vum Joer ënner gestaffelter Form weiderzeféieren. Mam Chômage partiel kréie Betriber, déi mussen zoumaachen, de Salaire vun hiren Employéen integral a bis zu 2,5 Mol de Mindestloun vum Staat bezuelt. Wéi RTL erkläert huet, ass et problematesch, wann e Betrib rëm Aktivitéiten ophëlt, mä net all seng Employéë beschäftegt, de Betrib kee Chômage partiel méi kritt, an awer all d’Salairë muss weiderbezuelen. De Guill Kaempff huet hei op der Antenn eng Fro un den Aarbechtsminister Dan Kersch lancéiert, an zwar, ob hien d’Leit léiwer am Chômage partiel huet oder am Chômage définitif.

D’Geschäfter si vum 11. Mee rëm op, mat Ausnamen an ënner aussergewéinleche Sécherheetskonditiounen. De President vun der Union Commerciale aus der Haaptstad ass net der Meenung, datt d’Clienten direkt wäerte kommen. Hien huet awer verséchert, datt shoppen an der Stad sécher ass, op d’mannst souvill wéi an de Grandes-Surfacen. De Guill Kaempff sot och, et wier kloer net fair gewiescht, datt d’Grandes-Surfacen hu weider dierfe Produite verkafen, déi näischt mat Liewensmëttel ze dinn hunn.

Invité vun der Redaktioun: Guill Kaempff

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.