E Mëttwoch de Moie war d'Spriecherin vun déi Lénk eis Invitée vun der Redaktioun.

D'Deputéiert géingen ëmmer manner informéiert ginn, et géing ëmmer manner Transparenz ginn, sou d'Spriecherin vun déi Lénk, e Mëttwoch de Moien hei op RTL. Als Beispill huet d'Carole Thoma och d’Epidemie-Gesetz genannt, mä awer och d'Verlängerung vun der Krisemesure, déi et erméiglecht, datt an den "essentielle" Secteure bis zu 12 Stonnen den Dag geschafft gëtt, respektiv 48 Stonnen d'Woch.

"A la limite" kéint een nach soen, am Ufank vun enger Epidemie gi Leit am Santéssecteur méi gebraucht, mä et wier absolut net novollzéibar, firwat zum Beispill Leit, déi bei engem Optiker oder op der Tankstell schaffen, och elo solle kënne méi laang schaffen. Elo, wou een am Deconfinement ass, wier och net novollzéibar, datt d’Mesure verlängert gouf. D'Carole Thoma sot an deem Zesummenhang, et kéint ee gutt verstoen, firwat d'Gewerkschaften d'Gedold verléieren. Et wier och guer net schlau vun der Regierung, d'Syndikater z'ignoréieren.

Déi Lénk hunn d'Hëllefsmesurë vun der Regierung begréisst, allerdéngs missten d'Betriber, wann et hinnen no der Kris besser geet, op d'mannst en Deel zeréckbezuelen an d'Hëllef dierf net genotzt ginn, fir ze restrukturéieren a Leit erauszegeheien. D'Carole Thoma huet och Bedenken, wat d'Staatsgarantien ugeet, wou een hirer Meenung no misst differenzéieren, jee no Gréisst vu Betrib.

D'Spriecherin vun déi Lénk huet e Mëttwoch de Moien iwwerdeems gemengt, et géing elo eng gutt Basis bestoen, fir datt all déi Beruffer, notamment am Santésberäich, besser Kollektivverträg kéinten aushandelen. Gëtt et no der Kris en Ëmdenken och beim Konsumverhalen? Do ass d'Carole Thoma der Meenung, datt et ee systemesche Wiessel muss ginn, amplaz den Eenzelen ze responsabiliséieren.

Invité vun der Redaktioun: Carole Thoma

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.