E Freideg de Moie war den CSV-Politiker eisen Invité vun der Redaktioun.

D'Regierung diskutéiert net, se informéiert just. Et gëtt keen Dialog an der Kris, sou d'Kritik vum CSV-Deputéierte Laurent Mosar um Freideg de Mueren am RTL-Interview.

Deen huet och bedauert, datt kee Minister mat him an en RTL-Face-à-Face wollt kommen.

D'Regierung géif och net agéieren, mä nëmme reagéieren. Bei der Exit-Strategie géif et un engem klore Konzept feelen.

D'Betriber kréien zwar gehollef, dat wier gutt. Mä dem Oppositiounspolitiker Mosar no, géifen der awer nach ëmmer vill net kënnen dovunner profitéieren. Notamment well d'Hëllefen un eng autorisation d'etablissement gebonne sinn. An esou eng hätte vill Independanten net.

D'Hëllefen wieren deels och ze lues an ze komplizéiert. Dat wéinst komplexen administrativen Prozeduren.

Dernieft géingen d'Montanten net duergoen. 32 Milliounen Euro Hëllefen, déi net missen zeréckbezuelt ginn. Am Kontext vun den 8,8 Milliarden Hëllefen am ganzen, wier dat ze wéineg. Dat seet de Laurent Mosar, dee virun der schlëmmster Wirtschaftskris zanter dem zweete Weltkrich warnt.

Invité vun der Redaktioun: Laurent Mosar

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.