En Dënschdeg de Moie war d'Direktesch vum LISER Invitée vun der Redaktioun.

Lëtzebuerg hätt am Lockdown net esou staark gelidde wéi d'Nopeschlänner. Dat, well eis Ekonomie sou opgebaut ass, datt ee vill vun Doheem aus konnt schaffen, also op den Teletravail konnt zréckgräifen. Dat huet d'Wirtschaft gerett an och Mënscheliewen. Dat sot d'Dr. Aline Müller, Cheffin vum Liser, dem Lëtzebuerger sozio-ekonomesche Fuerschungsinstitut. Si war en Dënschdeg de Moien eis Invitée vun der Redaktioun.

Den Teletravail huet der Wirtschaft enorm gehollef an och Mënscheliewen gerett. Et sollt een, soulaang een net weess, wou ee mam Virus drun ass, weider um Teletravail festhalen. Dat géif d'Leit schützen.

Duerch den Deconfinement géif den Impakt vun der Kris ëmmer manner grouss ginn op de PIB. Eng zweet Well an nees e Lockdown géif den Entreprisë vill schueden an et wär och ze fäerten, datt d'Leit net méi sou gutt matmaache wéi déi 1. Kéier.

D'Aline Müller warnt awer och, Lëtzebuerg wier eng oppen Ekonomie a wäert dowéinst ze spiere kréien, datt d'Ekonomien an den anere Länner méi staark vun der Corona-Kris getraff goufen.

Wëssen, wou de Virus ass, d'Leit testen, wär ganz wichteg. De Liser gehéiert och zur Taskforce Covid-19, déi d'Tester vun der ganzer Populatioun ënnerstëtzt. Et misst een awer och geziilt testen an och iwwer méi e laangen Zäitraum, fir e geneet Bild ze hunn.

Ganz wichteg wär och, d'Frontalieren an d'Strategie mat anzebezéien. Sou d'Cheffin vum Liser.

Invité vun der Redaktioun: Dr Aline Muller

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.