En Dënschdeg de Moie war de President vun der Horesca eisen Invité vun der Redaktioun.

"Mir sinn immens glécklech, datt mer kënnen opmaachen. Mä, et hätt een eis eng Woch éischter misse Bescheed soen, fir alles ze preparéieren". Dat sot den Horesca-President Alain Rix en Dënschdeg de Moien am RTL-Interview.

Invité vun der Redaktioun - Reportage Claudia Kollwelter

Et misste een och ophalen, de Leit Angscht ze maachen. D'Clientë vum Horesca-Secteur wieren nämlech sécher, wa se drénken oder iesse kommen. Och vulnerabel Persounen. 

D'Horesca hätt jo och en extra Sécherheetskonzept ausgeschafft, huet de President Alain Rix erkläert, deen och mengt, datt nëmmen 30 bis 40% vun de Clienten an enger éischter Phas wäerten zeréckkommen.

D'staatlech Hëllefe wiere gutt, missten awer op d'mannst bis Ënn dës Joer weider gëllen. Besonnesch wann d'Hëllefen zeréckbezuelt musse ginn, da wäert sech weisen, wéi eng Betriber d'Kris iwwerstinn a wéi eng net. 

Och bei den Hoteller gesäit Zukunft ellen aus. Dat well den Tourismus weltwäit schwéier agebrach ass. Den Alain Rix warnt d'Regierung virun enger Katastroph, wann de Secteur nees misst zoumaache well d'Infektiounen nees klammen.

Invité vun der Redaktioun: Alain Rix

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.