E Mëttwoch de Moie war de Generaldirekter vun der Chambre de Commerce eisen Invité vun der Redaktioun.

De Konjunkturpak "Neitstart Lëtzebuerg" wier massiv an huet gutt Elementer fir d'Relance. D'Critèren, wie vun den Hëllefe profitéiere kann, wieren och méi kloer. Dat Ganzt wier méi op d'Dauer ausgeluecht. Dat sot de Generaldirekter vun der Chambre de Commerce de Carlo Thelen am RTL-Interview iwwert der Regierung hiren annoncéierte Relancepak.

Et wier an enger éischter Phas an der Urgence gehandelt ginn, fir de Betriber et iwwerhaapt mol z'erlaben, fir z'iwwerliewen, fir hir Liquiditéit ze stäipen a se iwwert d'Ronnen ze bréngen. Dës generell Hëllefe wieren an där Phas och gutt gewiescht, mä et hätt net jidderee kënnen dovunner profitéieren, sou eisen Invité vun der Redaktioun. Eng Rei Betriber wieren duerch d'Netz gefall, besonnesch bei den net-remboursabelen Aiden.

Vun den 250 Milliounen Euro annoncéierten Direkt-Hëllefen, wieren der bis ewell nëmmen 65 Milliounen ausbezuelt ginn. Och bei den Hëllefen, déi een zeréckbezuele muss, wier bis elo nëmmen e Brochdeel ausgi ginn: 40 Millioune vun de 400, déi annoncéiert waren.

De Rescht, fuerdert de Generaldirekter vun der Chambre de Commerce, kéint jo elo an den neien Hëllefspak fléissen. Et misst ee kucken, datt d'Sue bei d'Leit kommen. Dee Pack wier och méi präzis a wier och laangfristeg geplangt.

De Carlo Thelen begréisst, datt mam "Neistart Lëtzebuerg" och op qualitativ Investissementer gesat gëtt. Notamment a Saachen Digitalisatioun a Nohaltegkeet.

Den Direkter vun der Chambre de Commerce huet awer och ënnerstrach, datt een och elo mat der nächster Phas vum Deconfinement nach net iwwert de Bierg wier. D'Kris wier nach laang eriwwer. All d'Deconfinementer wiere gutt a wichteg, mä et géif nëmme lues a progressiv eropgoen an et wier net ofzegesinn, wéini een nees am normale Regime ass.
Notamment och wéinst der ekonomescher Entwécklung am Ausland. D'Reprise vun de wirtschaftlechen Aktivitéite wier och sécher lues, well d'Konsumente fir déi nächst Méint nëmme wéineg Vertrauen hunn. Och an de Geschäfter wier de grousse Rush no der Reouverture ausbliwwen.

D'Belaaschtung vun de Staatsfinanzen duerch der Regierung hiren Hëllefspak war an den A vum Generaldirekter vun der Handelskammer inevitabel. Et wier kee Choix do gewiescht. Lëtzebuerg hätt mat sengem Triple A och d'Moyene gehat, fir vill Suen an de Grapp ze huelen.

Invité vun der Redaktioun: Carlo Thelen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.