En Dënschdeg de Moie war d'CSV-Deputéiert eis Invitée vun der Redaktioun.

Haislech Gewalt leeft net just tëscht Partner of, mä an der ganzer Famill, och vill Kanner sinn concernéiert, an dat stellt e grousse soziale Problem duer. Dat sot d’CSV-Deputéiert a fréier Chancëgläichheetsministesch Françoise Hetto als eis Invitée vun der Redaktioun. Iwwer 60 Prozent vun den Affer wiere Fraen, mä och Männer sinn Affer vun haislecher Gewalt. Dat wier nach e bëssen en Tabu-Thema.

1.337 Affer vun haislecher Gewalt gouf et zejoert, dovunner eng ganze Partie Mannerjäreger. Wat een géing erféieren, sou d'Françoise Hetto, wär wéi jonk d’Kanner deels sinn, déi geschloe ginn oder goufen. Bis ewell kéint och nach net jugéieren, dass wärend dem Confinement d’Fäll vun haislecher Gewalt an d’Luucht gaange sinn.

54 Prozent vun den Täter sinn iwwerdeems Widderhuelungstäter. De sougenannten elektronesche Bracelet wier dofir eng gutt Méiglechkeet, fir besonnesch si dovun ofzehalen, réckfälleg ze ginn a sech dem Affer manner wéi 100 Meter ze rapprochéieren. Och d'Justizministesch wéilt am Sënn vun engem bracelet électronique legiferéieren, sou nach d’CSV-Deputéiert. Bei Recidiviste misst een, op alle Fall, Zitat: ganz streng sinn.

Bedauere mécht déi fréier Ministesch, dass vill Dossieren iwwert Gewalt am Stot bei der Justiz laang géife schleefen. Do misst ee sech Froen, ob de Parquet iwwer genuch Ressourcë géing verfügen oder ob net genuch géing sensibiliséiert ginn, sou nach d'CSV-Deputéiert.

Invité vun der Redaktioun: Françoise Hetto-Gaasch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.