E Méindeg de Moie war d'Gesondheetsministesch eis Invitée vun der Redaktioun.

Déi Leit, déi sech elo nach mam Coronavirus infizéieren, géifen dat do maachen, wou sech net un d'Gestes barrièrë gehale géif, zum Beispill op der Aarbechtsplaz. Dat sot d'Gesondheetsministesch Paulette Lenert e Méindeg de Mueren am RTL-Interview. Dowéinst wier et wichteg, datt d'Hygienespläng vun de Betriber agehale ginn. Keng spezifesch Aktivitéit, déi elo nees erlaabt gouf, wéi zum Beispill Rassemblementer op der Kinnekswiss, wier als nei Quell vun Nei-Infektiounen identifizéiert ginn.

Invité vun der Redaktioun: Paulette Lenert

Eng liicht Hausse vun den Infektioune wier warscheinlech net ze evitéieren, elo wou d’Restriktiounen zu engem groussen Deel méi labber sinn. Et géif een awer hoffen, datt et net zu enger richteger zweeter Well kënnt. An dowéinst géif Alles gemaach ginn, fir en zweete Lockdown ze evitéieren. Et wier een op alle Fall preparéiert, fir séier kënnen ze reagéieren, wann d'Infektioune nees zouhuele géifen.

Zur ëmstriddener "Zwangshospitalisatioun", déi an engem vun de Post-Covid-Gesetzer virgesinn ass, sot d'Gesondheetsministesch, hei géing net den Direkter vun der Santé decidéieren, mä eng „autorité judiciaire“. Ze betoune wier och, datt den Direkter vun der Santé déi Prozedur just declenchéiert an zwar opgrond vun gesondheetlechen Constaten.

Déi Méiglechkeet besteet schonn duerch d'Santésgesetz vu 1980, mä wier och nëmme fir aussergewéinlech Fäll. Wärend der Covid19-Pandemie hätt et keng formell Zwangshospitalisatioun ginn. Fakt ass awer, datt d’Gesetz vu 1980 net ganz detailléiert ass an dowéinst gouf probéiert, wéinst der aktuelle Kris, méi Prezisioun eranzebréngen, wëssend, datt et ganz schwéier ass an der Urgence un esou Grondsazthemen ze schaffen. En Dënschdeg soll den Avis vum Staatsrot zum Gesetz virleien.

Paulette Lenert, Spëtzekandidatin bei der LSAP?

Op d’Fro, ob d’Paulette Lenert bei den nächste Chamberwalen an 3 Joer disponibel ass, fir Spëtzekandidat fir d’LSAP an ob se am Zentrum an net am Oste géing mat op d’Lëscht goen huet si geäntwert: "O Mamm o Kanner, ech hunn am Moment nach genuch à court terme ze schaffen".

Dat wiere Froen, déi si sech sécher net zu dësem Zäitpunkt géing stellen. "Prinzipiell sinn ech an d’Regierung komm, ech hunn do A gesot a wäert och B soen", sou d‘ Paulette Lenert. Wat dat an 3 Joer bedeit, dat wier nach sou wäit ewech a si bräicht nach Zäit fir ze kucken, wat si sech zoutraut a wat se am Liewe wéilt. Et géing nach vill Froen ze kläre ginn.

Invité vun der Redaktioun: Paulette Lenert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

Wéinst engem technesche Problem, ass leider kee Video-Replay vun der Emissioun disponibel. Merci fir Äert Versteesdemech.