E Mëttwoch de Moie war de President vun der Cour Supérieure de Justice den Invité vun der Redaktioun.

"Mir waren eis Meenung net gefrot ginn iwwert Covid-19 Gesetzer. Waren awer och eréischt méi spéit concernéiert, wéi och en Appell am Beräich vun den Zwangshospitalisatiounen méiglech gouf." Dat sot de President vun der Cour Supérieure de Justice an dem Verfassungsgeriicht Jean-Claude Wiwinius e Mëttwoch de Mueren am RTL-Interview. Hien hätt perséinlech intervenéiert, wéi een éischter per Zoufall op déi proposéiert Appellsméiglechkeet gefall wier. Et wier wichteg, datt d'Organisatiounsreegele vun der Justiz agehale ginn. E Cassatiounsriichter kéint net Appellriichter sinn.

Den Avis vum Staatsrot wier pertinent a fundéiert gewiescht. E wier awer leider net ganz am Detail iwwerholl ginn.
Detailer wieren awer wichteg viru Geriicht, sou de Jean-Claude Wiwinius.

Och déi praktesch Ëmsetzung vun der Zwangshospitalisatioun wier net evident. Wann dann e Patient, deen zwangshospitaliséiert soll ginn, physesch op d'Geriicht muss kommen. Tëscht den Zeilen huet de Jean-Claude Wiwinius ze verstoe ginn, hei misst den Text nach nogebessert ginn.

Wat d'Diskussioun iwwer d'Schutzmasken am Geriichtssall ugeet, déi notamment vun den Affekoten gefouert gëtt... Do misst de gesonde Mënscheverstand spillen, sou nach de President vun der Cour Supérieure de Justice an dem Verfassungsgeriicht.

D'Decisioun, ob ouni Mask plädéiert dierf ginn, wann d'Minimaldistanz respektéiert gëtt, läit beim President vun der zoustänneger Chamber. Hie géif decidéieren wat a senger Sitzung am Respekt vum Gesetz gemaach muss ginn. Zanter der leschter Woch ass op ville Plaz och Plexiglas um Geriicht installéiert. Hie géif d’Affekote verstoen, déi ouni Mask plädéiere wéilten, dat géif  och an 90% vun de Fäll ouni Problem goen. Wann de President vun der Sitzung awer Zweiwel hätt, hätt en aus Precautioun d’Recht fir ze verlaangen, datt Masken am Geriichtssall ugedoe ginn.
 
Dem Jean-Claude Wiwinius no hat de Lockdown um Geriicht keng Inzidenz bei deenen Affären, déi via "procédure écrite" den Ament traitéiert ginn. Hei wier weider deliberéiert a geschafft ginn. Anescht gesäit et am Strofrecht, um Tribunal de Commerce an um Friddensgeriicht aus, wou sech Affären ugestaut hunn an elo vill just op Rendez-vous geschafft géif.

Invité vun der Redaktioun: Jean-Claude Wiwinius

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.