En Donneschdeg de Moie war de Generaldirekter vun der Fedil eisen Invité vun der Redaktioun.

Et gouf spezifesch Problemer bei Guardian ginn. Effektiv bräicht een do all 15 Joer en neien Uewen, an dee Stéchdatum géif elo och nach an d'Corona-Kris falen. Esou d'Explikatioun vum Direkter vun der Industriellen-Federatioun FEDIL, René Winkin, en Donneschdeg de Mueren am RTL-Interview. 
Guardian wëll jo seng Glasproduktioun um Site Diddeleng stoppen. Dat ganzt wier eng individuell Decisioun, déi sech awer an engem allgemengen méi ongënschtege Kader beweegt.

Allgemeng géife wéinst der Pandemie Spuerpläng méi séier bei den Entreprisen duerchgesat ginn oder Investissementer op méi spéit geréckelt.

Dem René Winkin no wier et haut net ze spéit der Glasindustrie hei am Land besser Perspektiven ze ginn.

Guardian: Fabrick zu Käerjeng och a Gefor?
Et gouf spezifesch Problemer bei Guardian ginn. Effektiv bräicht een do all 15 Joer en neien Uewen, an dee Stéchdatum géif elo och nach an d'Corona-Kris falen.

Besser Perspektiven fir d‘Industrie

D'Politik géif der Industrie och allgemeng net genuch Perspektive ginn an d'administrative Demarchen fir sech hei am Land ze implantéieren, wieren ze lues. Et wier och nach ëmmer kee Plan sectoriel "Industriezonen" prett.
Do hofft de René Winkin op en Ëmdenken duerch d'Kris. Mir brauche méi Vitesse, sou den Invité vun der Redaktioun.

D'Industrie wier an enger permanenter Beweegung, ma hei am Land wier d'Erkenntnis verluer gaangen, datt ëmmer erëm mol eng Firma verschwanne kann. Duerfir misst d'Politik nees verstäerkt nei, aner Acteuren siche goen. An der Lescht wieren awer just Projeten zerriet ginn. Beispill Google a Knauf zum Beispill. Hei misst en Ëmdenken an der Attitüd kommen.

Lëtzebuerg wier nämlech nach ëmmer interessant als ekonomesche Standuert, besonnesch wéinst der geographescher Lag.

Wann awer Dossieren jorelaang op déi laang Bänk gedréckt ginn, ass dat Gëft fir d'Investissementer. Hei misst een iwwert säin eegene Schied sprangen a soen wat gemaach gëtt a wat net. Elo wiere mer nämlech schonn an enger Urgence.

Am europäesche Kontext gesäit de René Winkin Lacunnen tëscht de relativ konkreten Decisiounen wou et an der Klimapolitik sol higoen wat d'Käschten ugeet a vagen Decisioune bei de Perspektiven. Dat wier alles schlecht dephaséiert.

Nationalistesche Risiko

D'Annoncen, datt déi lokal Industrien an Zukunft notamment méi medezineschen Equipement fir den eegene Marché produzéiere sollten, gesäit de René Winkin fir d'alleréischt mol als politesch Reaktioun. Problematesch kéint et ginn, wann hei nationalistesch Iwwerleeungen d'Iwwerhand iwwerhuele géifen an d'Länner, wéi an der Kris, an hir Reflexer zeréckfale géifen an d'Grenzen zoumaache géifen. Deen Ament wier déi wirtschaftlech Plus-value fir déi concernéiert Firme méi geréng. Hei misst sech besonnesch och Lëtzebuerg als klengt Land d'Fro stellen, ob een international Connectioune ka liichtfankeg opginn.

Invité vun der Redaktioun: René Winkin

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.