E Freideg de Moie war de Wirtschaftsminister eisen Invité vun der Redaktioun.

“D'Kris ass e Marathon a mir sinn eréischt fréi an der Course.“ Dat sot de Wirtschaftsminister e Freideg de Moien hei op RTL, kuerz virun der Tripartite um Sennenger Schlass. De Franz Fayot huet weider Hëllef fir d’Betriber an Aussiicht gestallt: et bräicht een och nach Mesurë fir den Hierscht. Et wier awer nach ze fréi, fir konkret Mesuren z’annoncéieren, well et misst een och kucken, wéi déi Hëllefen, déi schonn decidéiert goufen, wierken.

Haaptsujet op der Reunioun mat Gewerkschaften a Patronat dëse Freideg ass de Maintien am Emploi, de Kampf géint de Chômage. Dofir wëll d’Regierung weider d’Ekonomie ukuerbelen. Dat kascht vill an déi Milliarden Hëllef solle jo eleng duerch Schold finanzéiert ginn. De Franz Fayot huet zouginn, datt déi Schold zum Deel duerch déi aner Generatioune wäert musse finanzéiert ginn. Allerdéngs géingen Investissementer an Infrastruktur oder an d’Zukunft hien net schockéieren, an d’Staatsfinanze wieren hei am Land nach ëmmer gesond.

Zur Steierreform, fir déi et manner Sputt gëtt, sot de Franz Fayot et wier ni drëm gaange fir "queesch duerch de Beet jidderengem Erliichterungen ze ginn". Den LSAP Minister betount, op kee Fall sollen d’Aarbecht an d’Entreprisë méi besteiert ginn, mä op anere Niveauen kéint de Lëtzebuerger Steiersystem méi gerecht gemaach ginn.

Dem LSAP-Minister no misst een och d’Kris notzen, fir der Wirtschaft "eng aner Nues" ze ginn. Dës misst méi nohalteg ginn an net méi ronderëm d’fossil Energie opgebaut ginn. De Prinzip vum Pollueur-Payeur misst déi Transitioun begleeden, also bleift et bei de Projete vun CO2 Steier op europäeschem Niveau a vun Hausse vun den Accisen um Bensin an Diesel. „Wat den Zäitpunkt ugeet, do muss een driwwer diskutéieren“, sou de Franz Fayot. Et wier d’Fro vum Phasage vun deem ganze Prozess ëm d’Transitioun.

Invité vun der Redaktioun: Franz Fayot

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.