E Méindeg de Moie war den Direkter vum Institut Luxembourgeois de Régulation eisen Invité vun der Redaktioun.

Méi séier, méi Volummen a manner Latenz-Zäit. Dat versprécht déi neiste Generatioun vun der Mobilfunk-Technologie, dat huet de Luc Tapella Direkter vum "Institut Luxembourgeois de Régulation", dem ILR, de Mueren am RTL-Interview erkläert.

Invité vun der Redaktioun: Luc Tapella - Resumé

Konkret kéinte mam 5G zum Beispill connectéiert Ambulanze Realitéit ginn. Net an all Ambulanz ka jo een Dokter dobäi sinn. Dofir fiert den Ambulancier mam Patient an d'Spidol. Iwwer 5G kritt den Dokter dann direkt all d'Donnéeën duerch déi verschidden Apparater, mat deenen de Patient verbonnen ass. Donieft géing un enger connectéierter Händsche geschafft ginn, mat där den Dokter dann och de Patient op Distanz oftaaschte kéint.

De 5G-Reseau steet awer och ëmmer nees an der Kritik wéinst der Stralung, déi kéint krankmaachen oder ass carrement Objet vu Fakenews. Angscht virun neien Technologien hätt et awer schonn ëmmer ginn, esou de Luc Tapella.

International Norme géifen awer d'Maximal-Leeschtunge vu 5G-Reseaue festleeën. A vun deene wier Lëtzebuerg nach wäit ewech. Dowéinst bräicht ee sech do keng Suergen ze maachen, sou den Direkter vum ILR.

Elo am Juli ginn op enger Stee zwou vu bis ewell dräi méigleche Frequenzen u fënnef méiglech Operateure versteet. Dat sinn d'Post, Eltrona, Luxembourg Online, Orange a Proximus. Déi Provider, déi den Zouschlag kruten, kënnen dann déi néideg Infrastrukturen opbauen. Do kënnen och verschidde 4G-Antenne mat agesat ginn. Enn dës Joers misst dann de 5G-Reseau zu Lëtzebuerg en place sinn. Am 700 Megahertz musse bis 2022 50 Prozent a bis 2024 90 Prozent vum Land ofgedeckt sinn.

Gréisser sougenannten "zone blanches" wéi an Däitschland oder a Frankräich, wou e puer Quadratkilometer guer kee Reseau ass, géifen et zu Lëtzebuerg op alle Fall net, versprécht de Luc Tapella, Direkter vum ILR.

Invité vun der Redaktioun: Luc Tapella

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.