E Freideg de Moie war de President vun der Dokteschassociatioun eisen Invité vun der Redaktioun.

Mir sinn an enger neier Well, eng zwee Well ka kee méi leugnen, seet den Dr. Alain Schmit, de President vun der Dokteschassocatioun AMMD war e Freideg de Moien eisen Invité vun der Redaktioun.

Et misst eng genee Analys gemaach ginn, wou d'Leit sech ustiechen. Den Dr. Schmit mengt net, datt d'Politik elo kéint näischt maachen, mä et bräicht ee Moossnamen, déi sënnvoll wieren. Mesuren, déi net do usetzen, wou se näischt bréngen.

Et misst een och kucken, all d'Leit z'erreechen, all d'Leit sensibiliséieren.

E Lockdown vun de Spideeler soll op jiddefalls verhënnert ginn.

D'Gesondheetsversuergung vun den anere Patienten dierft net ze kuerz kommen.

Den Dr. Alain Schmit wënscht sech och nees eng besser Koordinatioun tëscht der Politik, Fonctionnairen a Leit um Terrain. Déi hätt een elo net méi an dëser zweeter Well.

D'Dokteren hätte gesot kritt, datt et nees eng intern Krise-Cellule gëtt, mä wéi déi ausgesäit, wéisst een nach net.

De President vun der Dokteschassociatioun sot e Freideg de Moien och, datt d'Centre de soins avancés warscheinlech nees missten opgoen, elo wou een nees méi Patienten huet. Dat géif sech opdrängen.

Invité vun der Redaktioun: Dr. Alain Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.