En Donneschdeg de Moie war de President vun der neier "Luxembourg Event Association" eisen Invité vun der Redaktioun.

De Beräich vum Evenementiel ass nach net aus dem éischte Lockdown eraus. Zanter 5 Méint kënne mer guer net, oder bal guer net schaffen. Dat sot de Charles Schroeder, President vun der neier Federation LEA, der Luxembourg Event Association, am RTL-Interview um Donneschdeg de Mueren.

Den Event-Secteur wéisst och net wéini en nees ka starten. Déi aktuell Infektiounszuelen wiere jo net positiv fir eng Relance. D'Angscht ass do, datt dëst Joer net méi vill kënnt.

Op d'mannst Business-Evenementer, Foiren oder Salone missten awer nees méiglech ginn, wou een d'Sécherheet fir d'Leit kéint assuréieren. Wat natierlech bei engem Concert méi schwiereg ass, zum Beispill wéinst dem "Social Distancing". 

Et wiere vill Betriber an de Laberenten. Genee Zuelen iwwer méiglech Faillite konnt den Charles Schroeder vun der LEA awer net nennen. 3000 Leit schaffe fix am Event-Secteur.

D'staatlech Hëllefe ginn natierlech begréiss, ma de Fonctionnement vum Chômage partiell ass awer immens volatil.
Déi eng Méint kënnt vill, dann nees guer Näischt. Dat géif d'Patronen am Secteur nervös maachen, sou nach de President vun der Luxembourg Event Association.

Op eis Nofro hin, huet den zoustännege Minister Dan Kersch betount, hie wier zu all Ament oppen, fir all eenzelen Dossier nozekucken an z'iwwerpréiwen, wou de Problem louch. Dofir, esou den Dan Kersch, misst een awer konkret Beispiller nennen.

Invité vun der Redaktioun: Charles Schroeder

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.