E Méindeg de Moie war de Vizepresident vun der ALEM, der Associatioun vu Lëtzebuerger Medezinstudenten, eisen Invité vun der Redaktioun.

Vill Medezinstudenten déi am Ausland studéieren, kënne wuel am September nees op hir Uni goen a riskéieren net méi fir d’reserve sanitaire hei am Land disponibel sinn. Dat sot de Frédéric Schwarz, de Vizepresident vun der Associatioun vun de Lëtzebuerger Medezinstudenten um Méindeg de Moien hei op RTL.

Obwuel d’Zuel vun neien Infektiounen zanter Enn Juni relativ héisch ass, sinn aktuell keng Studenten am Asaz, ausser beim Large Scale Testing.

Lëtzebuerg ass immens ofhängeg vun Dokteren aus dem Ausland, donieft ginn zwee Drëttel vun den aktiven Dokteren an den nächste 15 Joer an d’Pensioun. Ma op d’mannst 30% vu de Lëtzebuerger Medezin-Studenten bleiwen och an deem Land, wou se hir Studie maachen. No quasi 10 Joer wou een am Ausland verbruet huet, do geet dacks de Lien mat Lëtzebuerg verluer, sou de Frédéric Schwarz, wat de Manktem u medezineschem Personal natierlech net méi kleng mécht.

D’ALEM bedauert dowéinst nach ëmmer, datt kee Master a Medezin op der Uni um Belval ugebuede gëtt. D’Argument vum DP-Héichschoulminister Claude Meisch, et géing ee mat engem Master riskéieren de privilegiéierten Zougank op auslännesch Unien ze verléieren, wollt de Frédéric Schwarz och net gëlle loossen. Déi ronn 40 Studenten, déi an en zweet Joer an d’Ausland ginn, géing mat engem Master hei am Land duerchaus kompenséiert ginn. Donieft géingen déi meescht Lëtzebuerger Studenten an Däitschland goen, wou et kee privilegiéierten Zougank géing ginn.

Invité vun der Redaktioun: Frédéric Schwarz

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.