E Mëttwoch de Moie war den Direkter vum Ordre des Architectes et des Ingénieurs-Conseils eisen Invité vun der Redaktioun.

Wéi wëlle mer zesumme liewen a wunnen, doriwwer wäert nees méi nogeduecht ginn, elo no esou enger Kris.

Wunn-Modeller, Schaffplazen, oder Fräizäitplazen – alles dat misst intelligent iwwerduecht ginn.

Där Meenung ass de Pierre Hurt, den Direkter vum Ordre des Architectes et des Ingénieurs-Conseils. Hie war e Mëttwoch de Moien eisen Invité vun der Redaktioun.

Wat d’Accessibilitéit zu Bauland ugeet, do kéim een net laanscht de Begrëff vun der Densitéit.

D’Urbanisten wieren do gefuerdert an natierlech och d’Politik, mä och d’Leit selwer, sou de Pierre Hurt, deen op de Nimbysmus verwisen huet, also Leit déi näischt am Hannergaart wëllen hunn.

D’Covid-Kris géing bei der Fro vun der Densitéit natierlech matspillen, mä dee Facteur dierf net eleng bestëmmen no wéi enge Modeller an Zukunft soll gebaut, oder ëmgebaut ginn.

Dem Direkter vum OAI no, wier eng gutt diversifiéiert Offer wichteg, mat engem breeden Zougang fir Leit, déi eng éischt Wunneng sichen.

Fir déi Bauhären ze belounen, déi Qualitéit héichhalen, iwwerreecht den OAI am September erëm de "Bauhärepräis".

Detailer iwwert all d’Projete fannt Dir op https://bhp.lu/ .

Invité vun der Redaktioun: Pierre Hurt

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.