E Méindeg de Moie war den Direkter vum Waasserwirtschaftsamt eisen Invité vun der Redaktioun.

Mir hu genuch Drénkwaasser, et ass alles am grénge Beräich. Dat sot den Direkter vum Waasserwirtschaftsamt, de Jean-Paul Lickes, am RTL-Interview e Méindeg de Moien.

Am Verglach mat de Jore virdru wieren an de Méint Juni a Juli 15 bis 20% manner Waasser verbraucht ginn. Dat, well et manner waarm gewiescht wier.  En Enkpass misst een dëse Summer och net méi fäerten. Wann de Congé collectif ufänkt, wier een nämlech iwwert de Bierg, well de Bau jo vill Waasser géif konsuméieren.

An awer soll ee spuersam mam Waasser ëmgoen, warnt de Jean-Paul Lickes vum Waasserwirtschaftsamt.  De Klimawandel ass nämlech schlecht fir d'Neibildung vum Grondwaasser. Ronn d'Hallschent vun eisem Waasser kënnt aus de Quellen, de Rescht aus dem Stauséi. Dowéinst misst een d'Ressourcë schützen.

De Pro-Kapp-Verbrauch soll och reduzéiert ginn. Aktuell leie mer bei 135 Liter pro Kapp den Dag, 20-25 % manner kéint een upeilen. Mä et bräicht een och eng nei gréisser Drénkwaasserquell. D'Musel wär do eng Léisung. Etüde sinn am gaangen. Ganz vill Länner géife sou en Uewerflächewaasser drénken. Nordrhein-Westefalen oder Holland huelen d'Waasserzum Beispill aus dem Rhäin. Waasser aus der Musel wär zwar opwendeg, erkläert de Jean-Paul Lickes, mä technesch machbar. D'Temperatur kéint ee mat enger Ënnergrond-Passage drécken. Den Challenge wär och, fir d'Waasser vun der Musel Richtung Stad bis bei d'Leit ze kréien. A 15 bis 20 Joer kéint dat de Fall sinn.

Invité vun der Redaktioun: Jean-Paul Lickes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.