Um Freideg de Moie war de President vun der nationaler Elterevertriedung eisen Invité vun der Redaktioun.

Déi national Elterevertriedung begréisst de proposéierte Stufeplang, deen den Educatiounsminister dës Woch an Aussiicht gestallt huet, dat sot de President Alain Massen um Freideg de Moien am RTL-Interview. Et misst een effektiv e flexibele Plang hunn, deen ëmmer der aktueller COVID-Situatioun an dem Enseignement kann ugepasst ginn.

E moduläre System, dee verschidden Zenarie virgesäit, tëscht deenen ee relativ séier hin an hir wiessele kéint, jee nodeem wéi sech d'Infektiounszuelen entwéckelen, sou datt Elteren wëssen, wat a wéi enger Situatioun op se duer kënnt. Et wier immens wichteg, datt d'Onsécherheet bei den Elteren an de Schüler opgehuewe gëtt. Och misst ee méi der Autonomie vun de Schoulen an de Regioune Rechnung droen. D'Situatioun wier zu Esch eng aner wéi an engem Duerf am Éislek. Alles dat wier ugeduecht a géif an déi richteg Richtung goen, esou eisen Invité vun der Redaktioun.

Wann d'Infektiounen sou staark géife zouhuelen, datt d'Klassen nees misste gespléckt ginn, misst dat besser organiséiert ginn, fuerdert den Alain Massen. D'Opdeelung an A- a B-Gruppen misst  sou gemaach ginn, datt d'Famillje besser a ganz seriö encadréiert gi beim Home-Schooling. Zum Beispill iwwer Videokonferenzen mam Schoulpersonal. Splitting géif besonnesch am Lycée Sënn maachen, do wou een aner technesch Moyenen hätt.

Covid-Tester fir all Schüler virun der Rentrée

Eng weider Fuerderung vun der Elterevereenegung: Test-Zenteren bei de Schoulen. Dat wier praktesch an da géifen d'Leit sech och méi teste loossen. Och sollten d'Schüler alleguerten nach emol virun der Rentrée an de Covid-Test geruff ginn.

Des weidere wier et wichteg, datt een och no der Vakanz nach weider Rattrapage-Coursen ubitt, fir kënnen d'Retarden opzefänken, déi effektiv duerch de Confinement entstane sinn, esou nach den Alain Massen vun der nationaler Elterevertriedung.

Den Austausch mam Educatiounsministère, huet sech der Elterevertriedung no verbessert. An den nächsten zwou Woche wéilt ee sech zesummesetzen, fir Iddien auszetauschen. Dat neit Schouljoer wëll den Alain Massen dann och an engem positive Geescht ugoen.

Invité vun der Redaktioun: Alain Massen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.