En Donneschdeg war de Beetebuerger Schäffen eisen Invité vun der Redaktioun.

Kënnt eng Jughurtsfabrick op Beetebuerg oder net? Wéi geet et weider am Dossier Fage? Dat hu mer den Donneschdeg de Moien de Beetebuerger Schäffe Gusty Graas gefrot, den DP-Deputéierte war den Invité vun der Redaktioun.

Des Woch sinn d'Delaie fir déi ëffentlech Consultatioun ofgelaf. Et wier vläicht méi transparent an objektiv gewiescht, wann een dëst net an d’Summervakanz geluecht hätt, ma do hätt d'Gemeng keen Afloss drop, sou de Gusty Graas.

16 Reklamatioune wieren erakomm vu Privatleit, awer och vun Associatiounen. An der Haaptsaach geet et do ëm de Waasserverbrauch. Fage bréicht jo ëmmerhin 2,5 Millioune Liter proppert Waasser den Dag fir d'Produktioun, e weidert grousst Thema wier d'Ofwaasser.

Wat ass da positiv um Dossier? Eng 100 nei Aarbechtsplaze kéinte geschaaft ginn, mä dat wier et dann awer och schonn.  D'Lëtzebuerger Bauere géingen allzäit net domadder rechnen, datt si als Produzenten eng grouss Roll wäerte spillen, sou den DP-Politiker.

De Ball léich elo bei der Regierung. De Beetebuerger Schäfferot hat scho virun 2 Joer eng Resolutioun ugeholl, wou eng ganz Rei Bedenke geäussert goufen.

Allgemeng géing dat Negatiivt am Dossier kloer iwwerweien, sou de Gusty Graas. Och déi gréng Schäffin Josée Lorsché huet den Donneschdeg de Moien am RTL-Interview betount, datt si dem Projet weiderhi ganz skeptesch géintiwwer steet.

Invité vun der Redaktioun: Gusty Graas

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.