E Méindeg de Moie war d'Directrice vum Naturpark Uewersauer eis Invitée vun der Redaktioun.

Um Stauséi gouf e Reservatiounssystem agefouert, fir d'Santé-Consignë besser kënnen ëmzesetzen. Dat sot d’Christine Lutgen e Méindeg de Moien als eis Invitée vun der Redaktioun.

Et gouf domat op Corona-Partye reagéiert, déi bis an déi fréi Moiesstonnen era gedauert hunn. Virun allem owes a nuets hate sech vill Leit laanscht de Stau versammelt. Derbäi koum, dass d’Dierfer ronderëm de Stau aus alle Néit geplatzt sinn, wat d’Autoen ugeet. Dacks gouf wëll geparkt. Fir d’Awunner wier dat net esou ze toleréiere gewiescht. Dat wier elo vill besser ginn, och well verschidde Plagen nuets zou sinn a well d'Police kontrolléiert.

Vum Christine Lutgen war et dann och den Appell, dass ee weiderhin immens gutt sollt oppassen, wann ee ronderëm de Séi spadséiere geet. Et koum rezent zu zwee Bëschbränn, an dee Risk géif och weiderhi bestoen, duerch déi grouss Dréchent aus der Lescht.

Am Naturpark hätt een iwwerdeems dëst Joer vill méi national Visiteuren wéi soss. 70% vun allen Touriste wiere Residenten. Allerdéngs wieren elo schonn d'Aktivitéiten all ausgebucht.

Den Naturpark Uewersauer ass e Syndikat, deen aus 5 Gemenge besteet, eng 6. Gemeng wëll nach derbäi kommen, nämlech Géisdref. D'Zil ass eng regional Entwécklung am Respekt vun der Natur. Den Naturpark huet eng 20 Mataarbechter. De Joresbudget läit bei 2 Milliounen, d'Hallschent vun deene Sue steieren d'Gemenge bäi.

Invité vun der Redaktioun: Christine Lutgen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.