En Donneschdeg de Moie war de gréngen Deputéierten a Stater Conseiller eisen Invité vun der Redaktioun.

Mir gesi ganz kloer de finanziellen Impakt duerch d'Corona-Kris a mir musse Léieren draus zéie fir d'Zukunft, fir méi krisefest ze ginn. Dat sot de François Benoy en Donneschdeg de Moien als eisen Invité vun der Redaktioun.

De gréngen Deputéierten ass de Budgetsrapporter fir 2021. Klimaschutz eescht huele wier do eng Prioritéit, an d'Ekonomie am Land méi nohalteg ze gestalten, wéi och e staarke Gesondheetssystem. D'Investissementer héich hale bleift ganz sécher weiderhi wichteg, seet de François Benoy. Do misst ee vläicht Scholde maachen, mä et géing een esou an d'Zukunft vum Land investéieren. Et misst ee sech an Zukunft och d'Verdeelungsfro am Land stellen, wat nach ëmmer e grousse Problem wier. Eleng d'Logementskris géif dat weisen.

A puncto Steierreform wier et wichteg, besonnesch déi vulnerabel an der Populatioun ze schützen an z'entlaaschten. Wougéint déi "breet Schëlleren" méi missten droen.

De François Benoy ass och Gemengerot an der Stad, an do ass him d'Mobilitéitspolitik vun der blo-schwaarzer Majoritéit e bëssen en Dar am A. Et géifen eng Jett Méiglechkeete verpasst ginn, fir méi Raum fir de Foussgänger an de Cyclist ze schafen. Dat wier och eng Opportunitéit fir de Stater Commerce.

Invité vun der Redaktioun: François Benoy

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.