En Dënschdeg de Moie war den Direkter vun der AIS eisen Invité vun der Redaktioun.

Mir hunn 1.200 Stéit op der Waardelëscht a 570 Wunnengen zur Dispositioun. D'Demande ass also méi grouss wéi d'Offer.
Dat huet den Direkter vun der Agence Immobilière Sociale, de Gilles Hempel, am RTL-Interview um Dënschdeg de Mueren erkläert. D'AIS vermëttelt a geréiert Locatiounswunnengen fir Sozial-Schwaacher. 

D'Proprietären, déi mat der AIS schaffen, wéilten net den héchste Loyer akasséieren, mä hir Wunnengen nëmme kuerz verlounen, mat der Garantie se och, wann néideg, nees séier kënnen zur Verfügung gestallt ze kréien, sou den Direkter vun der Agence immobilière sociale. Bei der AIS lount een och nëmme fir 3, 4 Joer a gëtt sozial begleet. 

D'AIS huet awer ëmmer méi Problemer hir sozial méi schwaach Clienten dann op den éischten, den normalen Immobiliemarché ze kréien. Dat besonnesch well d'Präisser do einfach ze séier klammen. Corona wäert nach de Problem verschäerfen, fäert de Gilles Hempel. Nach méi Leit wäerte mat hirem Kapital an de Steen investéieren.

Dowéinst wëll d'AIS selwer bauen. En éischte Projet zu Nidderkuer vu 7 Wunnenge soll am November prett sinn.
Mëttelfristeg wëll d'AIS 50 Wunnenge d'Joer zur Verfügung stellen. Mat de Gemengen zesumme schaffen.

Nieft der SNHBM an dem Fonds du Logement wier genuch Plaz fir en drëtte grousse Promoteur um soziale Wunnengsmaart, sou de Gilles Hempel vun der Agence Immobilière Sociale.

Invité vun der Redaktioun: Gilles Hempel
Soziale Wunnengsmaart: Demande méi grouss wéi Offer
De Gilles Hempel huet haut als Invité vum Dag vum Radio iwwer des Problematik geschwat an och d'Diskussioun iwwer Ierfschaftssteier kommentéiert.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.