E Méindeg de Moie war d'Gesondheetsministesch eis Invitée vun der Redaktioun.

Enn dës Joers oder Ufank d'nächst Joer kéint e Vaccin do sinn, dovunner geet ee beim Gesondheets-Ministère aus.

Et sollt een awer net iwwer Datumer spekuléieren, well et géing keng präzis Indikatioune ginn de Moment. Dat seet d'Gesondheetsministesch Paulette Lenert. Si war um Méindeg de Moien d'Invitée vun der Redaktioun.

Op alle Fall wier een zouversiichtlech, datt een déi néideg Quantitéite kritt, wann et esou wäit ass.

En Aarbechtsgrupp schafft grad un engem Plang, wou ënner anerem definéiert gëtt, wie prioritär soll geimpft ginn, dat sinn zum Beispill eeler Leit mat Virerkrankungen.

Déi zweet Corona-Well hätt ee relativ gutt an de Grëff kritt. D'Leit géinge sech besser un d'gestes barrières halen, vulnerabel Persoune géinge besser geschützt ginn.

Datt quasi keng Patienten an de Spideeler leien, géif ënner anerem doru leien, datt déi Infizéiert méi jonk sinn.

Interview Paulette Lenert
Enn dës Joers oder Ufank d'nächst Joer kéint e Vaccin do sinn, dovunner geet ee beim Gesondheets-Ministère aus.

Den Ament ginn déi meeschte Fäll aus dem Ausland no der Vakanz importéiert, d'Familljefester dominéieren net méi. Den Effet vun de Vakanze flaacht awer elo of. Ma fir den Hierscht géing een awer vun enger Recrudescence aus, sou d'Paulette Lenert.

An där nächster Phase soll dofir nach méi spezifesch a cibléiert getest ginn. Et wäert ee sech och e Stock u Schnelltester uschafen, soubal fiabel Produiten disponibel sinn. Schnelltester wieren allzäit en neie Moment an der Bekämpfung vum Virus.

D'Kaart vun der Transparenz wier Lëtzebuerg net unerkannt ginn, dofir géifen d'Frontalieren aus den Zuelen eraus gerechent ginn. Dat ännert awer näischt drun, datt d'Grenzgänger weider getest ginn, Bescheed gesot kréien an Tracing gemaach gëtt, sou d'Ministesch.

Et hätt een d'Kris bis elo verhältnesméisseg gutt geréiert, natierlech wéisst een elo haut, datt déi eng oder aner Mesure net verhältnesméisseg war.

D'Gesondheetsministesch stëmmt hirem däitschen Homolog zou, datt zum Beispill Butteker a Coifferen oder nach de Bau net onbedéngt hätte missten zoumaachen. Deemools hätt een dat awer net kënne wëssen an dofir wieren d'Mesuren zu deem Zäitpunkt och richteg gewiescht.

E Lockdown wéi am Mäerz wäert et an där Form net méi ginn zu Lëtzebuerg, dovunner geet d'Paulette Lenert aus

Invité vun der Redaktioun: Paulette Lenert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.