En Dënschdeg de Moie war den Affekot an neie President vun der Conférence du Jeune Barreau eisen Invité vun der Redaktioun.

Jonk Affekote verdéngen dacks net vill. Rieds ass vun Zommen, déi sech zum Deel souguer ënnert dem Mindestloun beweegen. Bei liberale Beruffer gëtt et jo ebe kee festgeluechte Minimum.

Genee sou e Minimum wéilt een awer zesumme mam Barreau elo fixéieren, et géing een un enger Konventioun schaffen, déi garantéiere soll, datt een op d'mannst de Salariés-Mindestloun kritt.

Dat alles sot den neie President vum Jeune Barreau. De Philippe Sylvestre war den Invité vun der Redaktioun um Dënschdeg de Moien.

De Jeune Barreau vertrëtt déi Affekoten, déi nach keng 10 Joer assermentéiert sinn, si maachen zu Lëtzebuerg d'Majoritéit aus. All Joers komme vill nei jonk Affekote bäi, déi virun allem a Geschäftsetudë schaffen.

Fir op de Barreau ze kommen, muss een de „cours complémentaire en droit luxembourgeois“ packen an do si gewëss Sproochkenntnisser gefrot, och am Lëtzebuergeschen.

Dat ass eng Dispositioun am entspriechende Gesetz, déi déi lescht Joren awer vill kritiséiert gouf, och vum Jeune Barreau. Ënner anerem gouf argumentéiert, datt potentiell gutt Leit den Examen net géinge packe wéinst engem Sproochentest, woubäi een dat Lëtzebuergescht am Finanzberäich zum Beispill net bräicht.

De Philippe Sylvestre gesäit dat perséinlech awer anescht a fënnt d'Ufuerderungen a puncto Sprooch wichteg.

Och d'Affekote si vun der Corona-Kris betraff. D'Geriichter waren zou, d'Ëmsätz si wärend enger kuerzer Zäit zeréckgaangen. Dës Kris war awer och d'Geleeënheet, fir d'Digitaliséierung weiderzedreiwen. De Programm „Paperless Justice" vum Barreau a vum Justizministère gouf acceleréiert, sou nach den Affekot Philippe Sylvestre.

Invité vun der Redaktioun: Philippe Sylvestre

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.