En Donneschdeg de Moie war den ITM-Direkter eisen Invité vun der Redaktioun.

D'Fäll vu Mënschenhandel an der Aarbechtswelt, déi rezent mediatiséiert goufen, sinn ons bekannt. D'ITM wier och schonn intervenéiert an d'Enquêtë géife lafen. Ma nach géif d'présomption d'innocence gëllen, dowéinst géifen déi concernéierte Betriber nach schaffen. Dat huet de Marco Boly, Generaldirekter vun der Gewerbeinspektioun, um Donneschdeg de Mueren am RTL-Interview erkläert.

Net méi spéit wéi spéit wéi e Mëttwoch war d'ITM fir eng laang geplangte Kontroll mat der Police bei där Baufirma op der Plaz, iwwert déi an der geschriwwener Press kuerz virdru vu Sozialdumping an Exploitatioun vun hire Matarbechter geschriwwe gouf. Faiten, déi RTL och schonn 2015 denoncéiert hat. En Donneschdeg wiere Chantiere vun där Firma zougestallt, Fermeturen ausgesprach a mat Mataarbechter geschwat ginn. D'Enquête wier am gaangen.

Méi héich Strofen

Dem Marco Boly no, kann ee sécher driwwer diskutéieren, d'Strofe méi streng ze maachen. Den Ament kann d'ITM Sanktiounen vun 251 bis zu maximal 25.000 Euro decidéieren. A Frankräich an der Belsch kéint een ëmmer eng Null hannen drun hänken, sot eisen Invité vun der Redaktioun. Speziell bei Recidivisten wier et méi dissuasiv, wann de Plaffong méi héich wier.

Allgemeng hätt d'ITM genuch Sanktiounsméiglechkeeten. Wann e Chantier zougemaach gëtt, géif méi wéi doen, wéi dee gréisste Protokoll, mengt den Direkter vun der Gewerbeinspektioun. Et muss awer virun allem nach weider beim Personal opgestockt ginn.

Rekrutement bei der ITM ni ofgeschloss

Do wier een am gaange mam néidege politesche Support, och mat bessere Formatiounen. Mir brauche méi a besser ausgebilte Leit, huet de Marco Boly widderholl.
En Effektiv vun iwwer 300 Mataarbechter, dovunner bis zu 180 Inspekteren, wier néideg, fir den ëmmer méi komplexen Oplagen am Code du Travail, an dem ekonomeschen Wuesstem gerecht ze ginn.

D'Gewerbeinspektioun huet zejoert eng 5.600 Kontrolle gemaach. A well ee méi present um Terrain wier, géif een e bessert Bild kréien, wéi sech d'Aarbechtswelt hei am Land entwéckelt huet. Lëtzebuerg géif trotz der Kris weider attraktiv bleiwen a vill Leit aus dem Ausland unzéien. Duerfir misst ee sech weider d'Moyene ginn, fir géint Sozialdumping an aner Verstéiss virzegoen.

Ëmmer méi Fäll vu Mannerjärege bekannt

Fir de Congé collectif hat d'ITM dëst Joer d'Effektiver eropgeschrauft. D'Kontrolle wieren och méi pertinent gewiescht. Et goufen alles an allem 283 Kontrolle gemaach. Duerch de Covid-19 wier et e bësschen e geckegt Joer gewiescht. Jiddereen hätt probéiert bis zum leschten Otemzuch ze schaffen. Duerfir wier et wichteg gewiescht fir ze kucken, datt de Congé collectif agehale gëtt.

Datt Verstéiss wéinst Mannerjärege festgestallt ginn, ass dem Direkter vun der ITM no méi seelen. Dat géif awer ëmmer méi dacks virkommen.

Covid-Reegele gi vun deene Meeschten Eescht geholl

Am Confinement huet d'Gewerbeinspektioun 3.200 Kontrolle gemaach. Déi wieren einfach gewiescht. Donieft wieren eng 1.300 Kontrollen via Checklëscht gemaach ginn, ob sech an de Betriber un d'Hygiènesmesuren an déi aner Virschrëften gehale gëtt. Grosso modo géif dat seriö gemaach ginn.

Invité vun der Redaktioun: Marco Boly

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.