E Freideg de Moie war de fréieren Direkter vum Tresor den Invité vun der Redaktioun.

D’aktuell Evolutioun vun de Staatsfinanze maachen dem fréiere Chef vum trésor public Suergen. De Georges Heinrich war e Freideg de Moien op RTL Radio Lëtzebuerg der Meenung, datt d’Regierung vläicht hätt misse manner generéis si mat den Hëllefsmesüre wärend dem Lockdown am Fréijoer. Hie geet nämlech dovunner aus, datt d’Kris e puer Phase wäert hunn. Elo wier kee Puffer méi do. Ee bis zwee Joer laang kéint een deen Defizit finanzéieren, mä méi laang wär et schwiereg.

De Georges Heinrich mécht sech keng Suergen, Lëtzebuerg géing an eng Scholdekris ewéi Griicheland viru puer Joer geroden, mä den Handlungsspillraum fir d’Zukunft wier méi kleng ginn. Notamment och wat de Pensiounssystem an d’Veralterung vun der Populatioun ugeet, de „Lochness Monster“ vun der Lëtzebuerger Politik, sou de fréiere Chef vum Tresor.

Laanscht eng „Consolidéierung“ vun de Staatsfinanze kéim een dem Georges Heinrich no net. Mä fir datt esou een Exercice erfollegräich ass, bräicht een e breeden a koherente Pak vu Mesuren. Dozou gehéieren „inevitablement“ Steiererhéijungen oder Upassungen, mä och Ajustementer bei den Ausgaben, sou de fréiere Chef vum Trésor.

Den Debat iwwert Steiergerechtegkeet, deen den CSV-Parteipresident Frank Engel lassgeléist huet, wier interessant, mä et soll ee sech net op eng oder zwou méiglech nei Steiere konzentréieren. Et kéint een am aktuelle System scho méi Steiergerechtegkeet erabréngen. Andeems zum Beispill een nach méi Progressivitéit erabréngt oder d’Basis vum besteierten Akommes erweidert. Fir Politik duerno an ee Gesetz afléissen loossen, dat wier och eng technesch Aarbecht, sou de Georges Heinrich.

Invité vun der Redaktioun: Georges Heinrich

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.