De President vum Wirtschafts- a Sozialrot war e Mëttwoch de Moien eisen Invité vun der Redaktioun.

E ka fir eng besser Liewensqualitéit suergen, mä d'Solidaritéit an d'Koherenz an enger Firma géifen erof goen. Et géif ee sech ënnerteneen och schlecht iwwert den Ecran kenne léieren an d'Gefor vun der Isolatioun géif bestoen. Dat sot de Jean-Jacques Rommes um Mëttwoch de Moien am RTL-Interview. Hien ass de President vum Wirtschafts- a Sozialrot, deen en Avis iwwert den Teletravail ausgeschafft huet.

1 bis 2 Deeg d'Woch wäre realistesch. Et misst een awer och wëssen, datt dat en Impakt op d'Economie am Land huet. Wann ee Véierel vun de Leit nëmmen een Dag vun doheem aus schafft, géif dat warscheinlech dausende vun Aarbechtsplaze kaschten, a vill Sue géifen an der Staatskeess feelen, ënnersträicht de Jean-Jacques Rommes.

Gutt d'Hallschent vun de Salariéen kéint och guer net vun doheem aus schaffen. E Recht op Teletravail géif also kee Sënn maachen. All Betrib misst kucken, wéi e sech am beschten organiséiert.

De Wirtschafts- a Sozialrot war a senger Analys och e bëssen iwwerrascht, datt d'Ëmwelt net därmoosse vum Homeoffice profitéiert. Den Impakt wär net sou grouss wéi ëmmer gemengt gëtt, well d'Leit awer zum Beispill akafe fueren. D'Stauproblemer zu de Spëtzenzäite kéinten awer entschäerft ginn.

Den Teletravail wäert sech lues a lues entwéckelen, elo an de Corona-Méint hätten d'Patronen an d'Leit gemierkt, wat et bréngt a wat net, sou de Jean-Jacques Rommes.

Gemierkt huet een och, wat d'Frontalieren dem Land bréngen. 43% vun de Salariéë si Frontalieren. Si hunn eng grouss Bedeitung fir d'Wirtschaft an de Sozialsystem. Ouni déi Leit bleift eist Land stoen, huet de President vum Wirtschafts- a Sozialrot et resuméiert. Mir brauche si bestëmmt sou vill wéi si eis, sou de Jean-Jacques Rommes.

Den Teletravail fir d'Frontaliere misst och harmoniséiert ginn, steierlech an och a Punkto Securité sociale an de verschiddene Länner.

Invité vun der Redaktioun: Jean-Jacques Rommes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.