De Logementsminister war en Donneschdeg de Moien eisen Invité vun der Redaktioun.

Déi aktuell Logementspolitik soll d'Offer um Wunnengsmaart stimuléieren. Et solle méi ëffentlech, bezuelbar Wunnenge geschaaft ginn an och an ëffentlecher Hand bleiwen. Dat ass mäi grousst Zil an dofir reforméieren ech d'Gesetzer, sot den Donneschdeg de Moien de grénge Logementsminister Henri Kox. Zanter genee engem Joer ass den Henri Kox op deem Posten a war en Donneschdeg eisen Invité vun der Redaktioun.

An der Vergaangenheet wiere Feeler geschitt, well Wunnengen, déi vum Staat subventionéiert goufen, um private Marché verschwonne sinn. Den neie Pacte Logement 2.0, dee vum nächste Joer u soll gëllen, soll an deem Sënn e Paradigmewiessel sinn.

D'Gemenge gi mat an d'Boot geholl, ginn net eleng gelooss a solle bezuelbare Wunnraum schafen. D'CSV-Kritik, datt et manner finanziell Hëllef fir Gemenge gëtt, léisst de grénge Minister net gëllen. D'Sue géinge just méi cibléiert agesat ginn. Hie wéilt och net elo op 40 Joer verfeelten CSV-Politik agoen, mä no vir kucken.

Datt de fräie Marché d'Präisser deels regléiert, dat weess och den Henri Kox, mä trotzdeem kéint een als Regierung eppes maachen, zum Beispill soll dat neit Mietgesetz hëllefen, d'Situatioun um Wunnengsmaart ze berouegen. Hie wär och bereet, méi wäit ze goen, wann dat gewënscht wier.

De Logementsproblem misst och Ministère-iwwergräifend attackéiert ginn. An deem Sënn wäerte weider Mesuren an der Ried zur Lag vun der Natioun, an zwou Wochen, annoncéiert ginn. Och steierlecher Natur, sou den Henri Kox.

De grénge Politiker ass och Policeminister. Et feele Polizisten. Dofir soll massiv rekrutéiert ginn, iwwer déi nächst 3 Joer 200 nei Polizisten d’Joer.

Mir ginn eis drun, datt dat klappt, weist sech den Henri Kox zouversiichtlech. Nom 15. Oktober gëtt eng Offensiv gestart, fir déi néideg Leit ze fannen. Och am Staatsapparat. 5.000 Leit wäre berechtegt, fir eng Karriär bei der Police unzefänken.

Et brauch ee jo déi Lëtzebuerger Nationalitéit, dorunner ännert sech elo mol näischt, sou de Minister. D’Chamber hätt hien awer gefrot fir z’analyséieren, ob net och d’EU-Nationalitéit duergeet. Egal wéi gëllt d’Sproocheklausel, datt ee muss Lëtzebuergesch kënnen.

Invité vun der Redaktioun: Henri Kox

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.